Daim bir çox cinayətkarlıq halları ilə qarşılaşan ABŞ Polisi daha bir səlahiyyətə sahib olub. Belə ki, ABŞ məhkəməsinin yeni qərarı ilə, ABŞ Polisi şübhəlini barmaq izi ilə telefon kilidini açmağa məcbur edəcək. Yeni qərara görə barmaq izi skan edilməsi artıq şübhəlinin saxlanılması zamanı əldə edilə bilinəcək. ABŞ 9-cu dairə Cəza Məhkəməsi verdiyi bu qərar ilə polislərin rastlaşdığı daha bir problemi həll edib.
Ümumiyyətlə, ABŞ-da polislər digər ölkələrlə müqayisədə daha çox hüquq və səlahiyyətlərə sahibdir. Belə ki, ABŞ-da polisin özünü qorumaq üçün şübhəliyə atəş açması və ya əmrlərinə tabe olmayan birisini zərərsiz hala gətirməsi tamamilə leqaldır. Hətta bir çox hallarda polislər şübhəlini öldürdükləri üçün məhkəməyə belə çıxmırlar. Yeni qərar da məhz polislərin lehinədir.
Əslində yeni qərar polislə şübhəli arasında yaşanan real hadisədən sonra verilib. Belə ki, 2021-ci ildə bir şəxs yol kənarında Kaliforniya polisi tərəfindən dayandırıldıqdan sonra həbs edilib. Məhz həmin sırada polis şəxsin telefonundakı kilidi məcburi olaraq açdırıb. Elə yeni qərarın alınmasına zəmin yaradan da bu hadisə olub. Polis tərəfindən məcbur edilən şəxs daha sonra məhkəməyə müraciət edərək haqlarının pozulduğunu iddia edib. Məhkəmə isə ilk dəfə olaraq belə bir hadisə ilə qarşı-qarşıya gəlib. Yekunda isə məhkəmə polisin şübhəlinin barmaq izi ilə telefon və ya elektronik cihaz kilidini aça bilməsini tamamilə leqal proses olaraq göstərib. Hələlik bu qərar bütün elektronik cihazlar üçün keçərli olmasa da, bu qərarla ABŞ polisi daha bir mövzuda səlahiyyət qazanıb deyə bilərik. Qeyd edək ki, telefonu məcburi olaraq açılan şəxs daha sonra narkotik daşıdığı üçün həbs edilmiş və qısa müddət sonra da həbsdən erkən buraxılmışdı..
