Bildiyimiz kimi, ötən günlərdə Xiaomi brendi ilk avtomobili SU7 modelini Çində gözləniləndən daha ucuz qiymətlə təqdim etmişdi. Bununla belə, indi ortaya çıxıb ki, şirkət yeni avtomobil modelləri üzərində işləməyə davam edir. Belə ki, əldə edilən məlumatlara görə, Xiaomi bu ilin sonuna qədər SUV tipli ikinci elektromobilini təqdim edə bilər.
Sadəcə 27 dəqiqə ərzində 50 mindən çox sifariş alan elektrikli sedan Çində, eləcə də bütün dünyada marağa səbəb olmuşdu. Məhz elektromobilin bu qədər maraq cəlb etməsi isə, onun iddia ediləndən daha ucuz qiymətlərlə insanlara təklif olunması və yüksək performans vəd etməsidir. Görünən odur ki, Xiaomi ilk elektromobilinə olan marağı gördükdən sonra bu ilin sonuna qədər SUV tipli ikinci elektromobilini təqdim etmək istəyir. Əslində Xioami brendinin SUV istehsal etməsi heç də təəccüblü hesab oluna bilməz. Çünki, son vaxtlarda yolsuzluq avtomobilləri dünyada populyarlaşıb. Maraqlısı budur ki, Xiaomi bu elektromobili ilin sonuna qədər təqdim etməyi düşünür. Avtomobil sahəsinə yeni daxil olmuş şirkət üçün bu qədər qısa vaxtda ikinci bir uğurlu model təqdim etmək həqiqətən də faydalı olar.
Elektrikli avtomobil biznesinə daxil olan yeni Çin markalarının əksəriyyətinin ilk modelləri yolsuzluq avtomobilləri idi. Belə ki, bunlara misal olaraq, Nio, Li Auto və XPeng brendlərini misal göstərmək olar. Ola bilsin ki, Xiaomi rəqiblərindən fərqlənmək və insanları təəccübləndirmək üçün ilk olaraq sedan buraxmağı üstün tutub. Bununla belə, növbəti addımda onun son dərəcə populyar SUV tipli bir avtomobil hazırlayacağı qaçılmaz görünür. Əlavə olaraq qeyd edək ki, Xiaomi SU7 modelini sifariş verənlər Standart, Pro və Max modellərindən asılı olaraq 20-23 həftə, 19-22 həftə və 28-31 həftə gözləməli olacaqlar. Təbii ki, səbəb çox açıqdır, Xiaomi bu qədər sifariş əldə edə biləcəyini təxmin etmirdi. Həmçinin, Xiaomi SU7 barədə məlumat əldə edə bilmək üçün saytda olan digər məqaləmizə keçid edə bilərsiniz.
