Google şirkətinin yeni və ən müasir Bay View kampusu qabaqcıl texnologiya və ikonik dizayn ilə tikilsə də, onun WiFi problemi olduğu ortaya çıxıb. Qeyd edək ki, texnologiya nəhəngi bu kampusu təxminən 2 il əvvəl açmışdı. O zaman Google, Bay View kampusunu ən son texnologiyaya və dizayna malik olaraq təqdim etmiş və və onu müvəffəqiyyətli olmaq üçün lazım olan bütün alətlərə malik bir mühit kimi təsvir etmişdi. Hətta şirkət, yeni binanı və ətrafdakı kampusu onun qabaqcıl xüsusiyyətlərini vurğulayan parlaq 229 səhifəlik kitabda nümayiş etdirmişdi.
Gözəl işıqlandırma, yüksək komfort, böyük iş masası və sürətli internet işçilərin ofis mühitində əsasən istədikləri şeylər arasındadır. Lakin, Google şirkətinin ən müasir kampusunda bu sadalananlardan bəlkədə ən önəmlisi WiFi yoxdur. Reuters-in məlumatına görə, sabit internet istəyən işçilər noutbuklarını Ethernet kabelinə qoşmalı və ya telefonlarını giriş nöqtəsi kimi istifadə etməlidirlər. Hətta mənbənin məlumatına görə, menecerlər bəzi işçilərə yaxşı internet üçün ofisdən kənar kafeyə getməyi də tövsiyə edir. Google sözçüsü Reuters-ə Bay View kampusunda WiFi problemi ilə üzləşdiklərini təsdiqləyib, lakin şirkətin problemi həll etmək üçün müxtəlif təkmilləşdirmələr etdiyi və tezliklə həllini tapacağı bildirilib.
Digər tərəfdən, Google WiFi probleminin nədən qaynaqlandığını açıqlamayıb. İşçilərin fikrincə isə bu problemə 600 min kvadratmetrlik binanın unikal dalğavari damı səbəb ola bilər. Qeyd edək ki, bu unikal dam altında şirkətin gələcəyinin açarı olan Gemini kimi qabaqcıl süni intellekt texnologiyaları üzərində iş aparılır.
