SpaceX, məlumatların peykdən birbaşa smartfona endirilməsi sahəsində mühüm mərhələyə çatıb. Belə ki, ötən gün Elon Musk sınaqlar zamanı şirkət mühəndislərinin maksimum endirmə sürəti qeyd etdiyini bildirib. Ümumiyyətlə bu sınaq mobil internet texnologiyasında irəliyə doğru böyük bir addım hesab oluna bilər. SpaceX və X şirkətinin baş direktoru İlon Maskın sözlərinə görə, SpaceX peykdən Android əməliyyat sistemi ilə işləyən Samsung smartfona birbaşa 17 Mbit/s maksimum yükləmə sürətinə nail olub.
Beləliklə smartfonların birbaşa olaraq heç bir avadanlığa ehtiyac duymadan peyk internetindən istifadə etməsi dövrü başlayır. Qeyd edək ki, SpaceX şirkətinin Starlink layihəsi də özlüyündə eyni strategiyaya dayanır. Lakin Starlink istifadə etmək üçün xüsusi avadanlığa ehtiyac yaranır. İndi isə SpaceX birbaşa smartfonunuzu peykdən gələn internetə qoşmağa şərait yaradır. Bu isə o deməkdir ki, dünyanın istənilən yerində heç bir internet narahatlığı olmayacaq. Elon bildirir ki, “Bu sadəcə tək bir şüanın və bağlantı kanalının cari maksimum sürətidir. Bağlantı kanalları isə mobil rabitə xidmətinin mövcud olmadığı hallarda onu effektiv etmək üçün kifayət qədər genişdir”.
Xatırladaq ki, SpaceX şirkəti ilk Direct to Cell peyklərini yanvar ayının başlarında kosmosa göndərmişdi. Sadəcə bir həftə sonra isə ilk qısa mesajlar da bu peyklər vasitəsi ilə göndərilmişdi. Hazırda şirkət, T-Mobile UЅ tərəfindən təqdim edilən 4G/LTE spektrindən istifadə edir. Bundan əlavə, Starlink-in DTC peykləri, xüsusi faza massivləri və yüksək həssaslığa sahib qəbuledicilər, güclü məlumatlarla təchiz olunub. Həmçinin o, bəzi yerli stansiyalara qoşulmaq üçün nəzərdə tutulmuş telefon antenalarından siqnal qəbul edir.
