Samsung TV tərəfində LG ilə əməkdaşlıq etməyi davam etdirəcək. Xatırladaq ki, Samsung və LG Display arasındakı müqavilə ötən il rəsmi olaraq elan edilmişdi. İndi isə müqavilənin yenilənməsi ilə birlikdə Samsung OLED TV seriyası üçün LG Display-dən 5 milyon OLED paneli alacaq. Ümumiyyətlə Samsung şirkətinin tərkibində olan Samsung Display də OLED panellər istehsal edir. Lakin Samsung Display əsasən mobil cihazlar üçün xüsusi olaraq OLED panellər istehsal etməyə fokuslanır.
Hazırda Samsung şirkətinin LG Display-dən yeni OLED TV seriyası modelləri üçün tələb olunan daha böyük ölçülü OLED panelləri alacağı ortaya çıxıb. Yeni hesabatda Samsung Electronics-in LG Display-dən 5 milyon OLED panel alacağı iddia edilir. Beləliklə LG Display növbəti beş il ərzində Samsung-a 5 milyon OLED panel təqdim edəcək. Qeyd edək ki, bu il cənubi koreyalı texnologiya nəhənginə 800 min OLED panel tədarük ediləcək. Habelə tədarük ediləcək panellər arasında Samsung-un 55 düym, 64 düym, 77 düym və 83 düym OLED televizor modelləri üçün lazım olan panellər mövcuddur. Bu modellər üçün panellər təmin edən LG Display ilə istehlakçılara 42 düym və 48 düym ölçü seçimləri də təklif oluna bilər.
Qeyd edək ki, Samsung LG-dən OLED panelləri ilə yanaşı LCD panelləri də almağa davam edəcək. Ötən il 3 milyon LCD panel sifariş edən Samsung-un bu il 6 milyona yaxın LCD panel alacağı bildirilir. OLED televizor panelləri bazarının lideri LG Display, hazırda qlobal OLED televizor panelləri bazarının 80%-ni təşkil edir. Həmçinin LG Display 80 düymdən böyük OLED televizor panellərini kütləvi istehsal edən yeganə şirkətdir.
