Dünyanın ən nüfuzlu iqtisadi güclərindən olan Amazon ayaqqabılar üçün virtual məhsul sınaq xüsusiyyətini gətirərək AR alış-verişinə doğru addımlayır. Bu yeni virtual try-on xüsusiyyətinin dəstəyi ilə sifarişçilər məhsulu üzərlərində yoxlayacaq və məhsul haqqında daha çox məlumat əldə etmiş olacaqlar. Onlayn alış-veriş edərkən məhsulun üzərimizdə necə görünəcəyini bilmədiyimiz üçün bəzən almaqda tərəddüd edə bilirik. Virtual try-on vasitəsilə ayaqqabı alış-verişlərimizdəki bu tərəddüd aradan götürülə bilər. Daha əvvəl Snapchat, Instagram və YouTube-da gördüyümüz bu xüsusiyyət müştərilərin telefon vasitəsilə məhsulu sınamasına şərait yaradır. Beləliklə sosial ticarətdə transformasiya və marka şüurunu yaratmaq üçün istifadə edilən AR dəstəkli virtual məhsul sınaq təcrübələri dünyanın ən mühüm e-ticarət platformalarından birində də öz yerini tutdu.
Qeyd edək ki, bu Amazonun AR-ə yönəlmiş ilk təcrübəsi deyil. Şirkət 2020-ci ilin avqust ayında AR alış-veriş xüsusiyyəti ilə Amazondan aldığınız mebellərin evinizdə necə görünəcəyini test edə biləcəyiniz texnologiyanı təqdim etmişdi. Bundan başqa 2017-ci ildə isə iOS tətbiqinə AR stikerləri əlavə edilmişdi.
Virtual try-on xüsusiyyəti necə işləyir?
Belə ki, istifadəçilər bəyəndikləri ayaqqabının üzərlərində necə görünəcəyini yoxlamaq üçün telefonun kamerasını ayaqlarına yönəldirlər. Bu vasitə ilə ayaqqabı məhsulunun üzərlərində necə görünəcəyini test edir və məhsul haqqında daha çox məlumat əldə etmiş olurlar. Virtual try-on ilə edə biləcəkləriniz bununla bitmir. Tətbiqdə təklif olunan karusel görünüşü ilə ayaqqabıların fərqli rənglərini yoxlamaq və hətta şəklini çəkməkdə mümkündür. Çəkilən şəkli tətbiqdə yer alan paylaş düyməsi ilə sosial şəbəkə hesablarınızda paylaşmaq və ya sadəcə telefona yükləmək olur. Hazırda ABŞ və Kanadada əlçatan olan yenilikdən sadəcə İOS istifadəçiləri istifadə edə bilir. Hələ ki, yalnız New Balance, Adidas, Reebok, Puma, Saucony, Lacoste, Asics və Superga ayaqqabılarını sınaqdan keçirə bilirlər.
5 iyul 1994-cü ildə Jeff Bezos tərəfindən qurulan, bir zamanlar sadəcə onlayn kitab satış yeri olan Amazon indi “Dünyanın ən böyük 5 şirkəti” siyahısında yer alır. Başqa e-ticarət şirkətlərinin də Amazonun izindən gedərək bu tərz texnologiyaları və ya daha da üstün versiyalarını təqdim edəcəklərini demək çətin deyil.
