Samsung brendi Galaxy FE seriyasına yeni modellər əlavə edib. Belə ki, Samsung ötən gün yeni Galaxy S23 FE smartfonunu, Galaxy Buds FE qulaqlığını və Tab S9 FE planşetlərini təqdim edib. Biz artıq Galaxy S23 FE smartfonu barədə məlumatları sizlərlə paylaşmışıq. İndi isə texnologiya nəhənginin yeni Galaxy Buds FE və Tab S9 FE modelləri barədə danışacağıq. Gəlin əvvəlcə yeni Galaxy Buds FE barədə danışaq.
Galaxy Buds FE qulaqlığı bizə nələr vəd edir?
Samsung brendinin Fan Edition və ya FE seriyasına əlavə etdiyi yeni modellərdən biri də Galaxy Buds FE qulaqlıqlarıdır. Texnologiya nəhəngi yeni qulaqlıq ilə bizlərə daha sərfəli alternativ təklif edir. Belə ki, yeni qulaqlıq original Galaxy Buds modelindən performans tərəfində elə də fərqlənməsə də, qiymət cəhətində çox fərqlənir. Qeyd edək ki, bu qulaqlıq digər Galaxy Buds modellərindən fərqli olaraq tək sürücüyə malik olub. O cümlədən qulaqlıq Bluetooth 5.2 bağlantısı, AAC, SBC, SSC kodekləri dəstəkləyir. Maraqlısı budur ki, Samsung sərfəli qulaqlıqlarına səs-küyün azaldılması yəni ANC xüsusiyyətini də əlavə edir.
Bundan əlavə yeni Galaxy Buds FE qulaqlığı səsli zəng keyfiyyətini yaxşılaşdıran 3 mikrofona sahib olub. Hətta qulaqlıqda musiqi və videonu avtomatik dayandıra bilən sensor da mövcuddur. Batareya tərəfində isə Galaxy Buds FE, Samsungun bütün simsiz qulaqlıqları arasında ən uzun batareya ömrünü təklif edən qulaqlıqdır. Belə ki, qulaqlıq ANC söndürüldükdə 8,5 saata qədər, şarj qutusu ilə isə 30 saata qədər istifadə təklif edir. ANC-nin aktiv olması ilə isə 6 saata qədər, şarj qutusu ilə isə 21 saata qədər batareya ömrü təklif edir. Onu da qeyd edək ki, yeni qulaqlıq qara və ağ olmaqla 2 rəng seçimi ilə təklif olunur və başlanğıc qiyməti 99 dollardır.
Samsung Galaxy Tab S9 FE hansı xüsusiyyətlərə malikdir?
Samsung tərəfindən FE adı altında təqdim edilən digər model də Galaxy Tab S9 FE planşetidir. Gəlin görək texniki tərəfdən cihaz hansı funksiyalara sahibdir. İlk öncə onu qeyd edək ki, Galaxy Tab S9 FE seriyasına 2 model aiddir. Bunlar müvafiq olaraq Galaxy Tab S9 FE və S9 FE+ modelləridir. Dizayn cəhətdən hər iki model sələfi ilə eyni dizayna malikdir. Texniki cəhətdən isə Galaxy Tab S9 FE 90 hz yenilənmə tezliyinə malik 10.9 düymlük IPS LCD ekrana, Tab S9 FE+ isə 12.4 düymlük ekrana sahib olub.
O cümlədən yeni FE imzalı planşetlər 5 nanometrlik istehsal prosesinə əsaslanan Exynos 1380 tərəfindən dəstəklənir. 5G dəstəkli bu prosessor dörd 2,4 GHz Cortex-A78 və dörd 2,0 GHz Cortex-A55 nüvəsinə malikdir. Galaxy Tab S9 FE kamera tərəfində 8MP əsas kamera, 12 MP selfie-kamerasına sahib olub. Tab S9 FE+ da isə işlər biraz daha mürəkkəbdir. Belə ki, bu cihaz əlavə olaraq 8MP ultra-genişbucaaqlı kameraya sahib olub. İki cihaz arasındakı başqa bir fərq batareya tərəfindədir. Tab S9 FE modelində 8000 mAh batareya olduğu halda, Tab S9 FE+ modelində 10090 mAh batareya var. Samsung bildirib ki, Galaxy Tab S9 FE modeli avropada 529 avro, Tab S9 FE+ isə 699 avro başlanğıc qiymətinə sahib olacaq. O cümlədən cihazlar sabahdan etibarən satışa çıxarılacaq.
