Gözlənilən an gəldi çatdı. Elektromobil bazarında lider mövqelər dəyişib. Belə ki, çinin elektromobil nəhəngi BYD bazarda Tesla şirkətini geridə qoyaraq onun qlobal liderliyini əlindən alıb. Bloomberg mənbəsinə görə çinli avtomobil nəhəngi qlobal liderliyi ələ ala bilib. Ümumiyyətlə BYD elektromobilləri həm ucuz qiyməti, həm də peformansına görə rəqiblərindən fərqlənir. Məhz bu amillər şirkətin qlobal liderliyi ələ almasında böyük rol oynayıb.
Qeyd edək ki, Tesla üçün üçüncü rübün nəticələri ümumiləşdirilib. Ötən hesabat dövründə şirkət, 430 488 ədəd elektromobil istehsal edib ki, bu da ikinci rüblə müqayisədə 10 faiz azdır. Çinin avtomobil nəhəngi BYD isə Tesla şirkətini qabaqlayaraq 440 min elektromobil istehsal edə bilib. Maraqlısı budur ki, Tesla ötən il ilə müqayisədə sadəcə 25% irəliləyiş, əldə etsə də, bu göstərici BYD üçün 67% olub. Məhz bu da BYD brendini bu ilin üçüncü rübünün sonunda dünyanın ən böyük elektromobil istehsalçısına çevirib.
Satış tərəfində isə vəziyyət biraz fərqlidir. Belə ki, Tesla satış həcminə görə çinli rəqibini qabaqlayır. BYD-nin 2023-cü ilin üçüncü rübündə dünya üzrə 431 min 603 elektrikli avtomobil satdığı və bu rəqəmin ilin əvvəlki rübünə nisbətən 23% artdığı bildirilir. Tesla isə eyni dövrdə bu göstəricini 435059-a çatdıra bilib. Əgər biz hibrid avtomobil satışını da nəzərə alsaq BYD yenə önə keçir. Son ildə isə BYD 1.4 milyon, Tesla 1.8 milyon elektromobil istehsal edə bilib. Hibrid modellər ilə birlikdə isə BYD təxminən 3 milyon ədəd elektrikli avtomobil istehsal edir.
