İnnovasiya və Rəqəmsal İnkişaf Agentliyinin dəstəyi, “Future Education” şirkətinin təşəbbüsü ilə yaradılan “Founders Academy” proqramına qeydiyyat açıq elan edilir.
“Founders Academy” vasitəsilə yerli startap nümayəndələri və innovasiya proqramlarında operator qismində çalışan şəxslər dünyanın ən böyük və “unicorn” şirkətlərinin təcrübəsindən yararlana biləcəklər.
Proqram Bakıda baş tutacaq iki günlük “bootcamp” və ardınca ölkə xaricində 3 aydan 6 aya qədər davam edəcək təcrübə proqramını özündə birləşdirir. “Founders Academy” vasitəsilə yerli ekosistem nümayəndələri dünyanın müxtəlif ölkələrində fəaliyyət göstərən nüfuzlu texnologiya şirkətlərində təcrübə proqramı keçəcəklər.
Proqram çərçivəsində 10 startap və 2 proqram operatorunun seçilməsi nəzərdə tutulub. İnnovasiya və Rəqəmsal İnkişaf Agentliyinin İnnovasiya Ekosistemi Departamentinin rəhbəri Yevgeniya Bikmurzina proqram haqqında qeyd edib:
Yevgeniya Bikmurzina
“Böyük məmnunluq hissi ilə bildirmək istəyirəm ki, agentlik olaraq dünyada ilk dəfə startaplar və innovasiya proqramlarında operator qismində çalışan şəxslər üçün beynəlxalq təcrübə proqramını həyata keçiririk. Proqram çərçivəsində Azərbaycan startapları dünyanın fərqli yerlərində fəaliyyət göstərən və yerləşdiyi ölkənin iqtisadi inkişafına böyük töhfələr verən “unicorn” startaplarda və eyni zamanda dünyaca tanınmış qlobal şirkətlərin əsas idarəetmə mərkəzlərində oflayn formatda təcrübə proqramı keçəcəklər. Bu da öz növbəsibdə proqram iştirakçılarına qazandıqları təcrübəni öz startaplarında və rəhbərlik etdikləri proqramlarda tətbiq etmək şansı qazandıracaq”.
Proqramın əsas təşəbbüskarı olan “Future Education” şirkətinin təsisçisi Sebastien Tupi proqramın məqsəd və missiyalarından danışıb:
Sebastien Tupi
“Ekosistemin ən vacib resursu insanlardır. Elə bu baxışı əsas götürərək “Founders Academy” proqramının yaradılmasına təşəbbüs göstərdik. Əslində proqramın arxasında dayanan çox uzaqgörən missiya var. Biz bu proqram vasitəsilə ekskluziv öyrənmə təcrübəsi və tanınmış təsisçilər və startaplarla qarşılıqlı əlaqələrin asanlaşdırılmasını təmin edirik. Əsas məqsəd isə Azərbaycanının startap ekosisteminin böyüməsini sürətləndirmək və startapların öz potensiallarını tam şəkildə üzə çıxarmasını təmin etməkdir”.
Qeyd edək ki, proqram çərçivəsində son qeydiyyat tarixi 3 iyul 2023-cü ildir.
Qeydiyyat üçün keçid edin:
