Nəhayət, hamının maraqla gözlədiyi Redmi Note 12 seriyası barədə detallar artıq yavaş-yavaş bəlli olmağa başlayır. Əslində yavaş-yavaş demək doğru olmaz, çünki heç bir detal dəqiq bəlli olmadan bir anda ötən saatlarda seriya daxilində bütün potensial cihazlar qarşımıza çıxdı. Beləliklə, gəlin cihazlarla vaxt itirmədən tanış olmağa başlayaq. İlk olaraq smartfonların təqdimat tarixi bildiyiniz kimi 23 mart tarixinə təsadüf edəcək. Təqdimat boyunca isə Redmi Note 12 Pro+ 5G, Redmi Note 12 Pro 5G, Redmi Note 12 5G və Redmi Note 12 modellərini görəcəyik. Redmi Note 12S modeli barədə bəzi detallar bir neçə gün əvvəl sızdırılmışdı. Lakin hal-hazırda aşağıda paylaşılan posterə görə Redmi Note 12 seriyasından “S” uzantılı modellə bağlı detallar ümumiyyətlə mövcud deyil.
İndi isə posterdəki cihazların texniki xüsusiyyətlərinə nəzər salaq. Redmi Note 12 Pro+ modelindən başlasaq bu cihaz tam texniki xüsusiyyətləri nəzərən Çində çıxmış 210 vatt sürətli şarj dəstəkləyən Redmi Note 12 Pro+ ilə eynidir. Redmi Note 12 Pro+ modeli sahib olduğu detallar hesabına seriyanın ən güclü nümayəndəsi hesab edilir. Smartfon öz gücünü Dimensity 1080 çipsetindən alır, 200MP (Samsung ISOCELL HPX 200MP) OIS ilə gücləndirilmiş əsas, 8MP ultra geniş, 2MP makro kamerasına malikdir. 6.67 düymlük 120Hz tezlikli DolbyAtmos sertifikatına malik Flow AMOLED ekran paneli ilə təchiz edilib. 5000 mAs həcmli batareyası 210 vatt sürətli şarj dəstəkləyir.
Redmi Note 12 Pro modelində isə detallar cüzi dəyişiklikləri ilə fərqlənir. Bu dəyişikliklər isə özünü əsas kameranın 50MP IMX766 ilə əvəzlənməsi və batareyanın 120 vatt olması cəhətdən göstərir. OIS stabilizatoru ilə gücləndirmə isə üst modeldə olduğu kimi qorunub.
Redmi Note 12 5G və Redmi Note 12 modelləri isə özlüyündə müəyyən qədər nisbətən daha aşağı qiymət səviyyəsi üçün nəzərdə tutulmuş cihazlar kimi çıxış edirlər. Redmi Note 12 5G modelində Snnapdragon 4 Gen 1 çipseti işlənərkən, sadə Redmi Note 12 modelində Snapdragon 685 çipsetini görürük. Hər iki cihazda 120Hz tezlikli 6.67 düymlük AMOLED ekran paneli işlədilib. Redmi Note 12 5G modelində 48MP əsas kamera, Redmi Note 12 sadə modelində 50MP təsvir ölçülü sensorla əvəzlənib.
Ümumilikdə 4 cihaz da MIUI 14 interfeysi ilə təchiz edilmiş olub, IP53 sertifikatı ilə su sıçramaları və toza qarşı dayanıqlıdır. Cihazların qiyməti isə naməlumdur. Bütün bu detalların nə qədər doğru olduğunu isə 23 mart tarixində baş verməsi gözlənilən tədbirdən sonra biləcəyik.
