Xiaomi şirkətinin bu gün keçirdiyi tədbirdə yeni nəsil Redmi Note 12 seriyası modelləri Çində təqdim edildi. İlk olaraq başlayaq gözlədiyimiz və görə bilmədiyimiz detallardan. Belə ki, smartfonların təqdimatına dair paylaşılan ilk posterlərdə modellər arasında qıvrımlı (əyri) ekrana sahib bir model göstərilmişdi. Lakin Redmi Note 12 seriyasının təqdimatı ərzində belə bir model qarşımıza çıxmadı. 210 Vatt sürətli şarj, 200MP kamera kimi xüsusiyyətləri Redmi Note 12 seriyasında görsək də qıvrımlı ekran panelinə sahib orta seqment smartfondan əsər-əlamət yox idi. Şirkət sanki, bu addımı ilə istifadəçilərin “nəbzini ölçmək” istəyirdi. Qeyd etməliyik ki, təəssüflənməyinizə dəyməz. Çünki, sertifikatlaşdırılmış modellər arasında yeni Xiaomi 12 Lite NE modeli mövcuddur və qlobal bazar üçün nəzərdə tutulmuş bu cihaz, Xiaomi Civi 2 modelinin təkrar brendləşdirilmiş versiyasıdır. Yəni Redmi Note 12 seriyasında fərqli olaraq qlobal bazara yaxın vaxtlarda premium görünüşlü orta seqment Xiaomi modeli gələ bilər. İndi isə 5 fərqli adla tanıdılan, lakin eyni və ya oxşar xüsusiyyətləri paylaşan smartfonlar barədə danışaq.
Redmi Note 12 Pro+, Redmi Note 12 YIBO Racing Edition və Redmi Note 12 Discovery olaraq adlandırılmış modellər bir-birlərindən nəyə görə fərqlənirlər?
Redmi Note 12 seriyası daxilində 5 modeldən 3-ü eyni gövdəyə sahib, lakin cüzi texniki dəyişiklər edilmiş cihazlar hesab edilirlər. İlk olaraq smartfonların dizaynına baxsaq olduqca sadə bir dizayn qarşımıza çıxır. Redmi Note 12 Discovery modeli ilə adı çəkilən digər 2 model arasındakı texniki fərq sadəcə 210 Vatt sürətli şarj dəstəyidir. Redmi Note 12 YIBO Racing Edition isə xüsusi yaşıl rəngi ilə, Redmi Note 12 Discovery isə tünd qara rəngi ilə fərqlənir.
Smartfonların üçü də öz gücünü Dimensity 1080 çipsetindən alır. Performansı Dimensity 920 ilə müqayisədə demək olar heç dəyişmir. AnTuTu testinin nəticəsindən də görəcəyiniz kimi performans cəhətdən Snapdragon 778G çipseti ilə eyni, hətta biraz gerisində nəticə göstərir. Gülünc olan bir şey var ki, smartfona UFS 2.2 və LPDDR4X yaddaş texnologiyaları quraşdırılıb. Nəticə etibarilə performansı yetərli olsa da məsələn, POCO X4 GT ilə müqayisədə xeyli geri qalacaq. Smartfonlara 3000mm² buxar qazanı quraşdırıldığı bildirilir, lakin bunun da elə bir əhəmiyyəti yoxdur.
Lakin qeyd etməliyik ki, Redmi Note 12 modelinə olduqca güclü ekran paneli quraşdırılıb. 6.67 düymlük FHD+ OLED ekran 120Hz adaptiv yeniləmə tezliyinə sahibdir. Bu ekran gözlərinizin sağlamlığı üçün 1920Hz tezlikli PWM texnologiyası, Dolby Vision dəstəyi, 16000 səviyyəli parlaqlıq tənzimləməsi, HDR10+, 10 bit rəng dərinliyi və.s kimi xüsusiyyətləri özündə birləşdirib.
Kamera parametrlərinə baxdıqda isə Dimensity 1080 çipsetinə niyə keçid edildiyini anlamaq olur. Yeni çipseti 200MP kamera istifadəsinə imkan verdiyi üçün bu cihaza Samsung ISOCELL HPX 200MP sensoru quraşdırılıb. 1/1.4 düymlük kamera sensoru OIS stabilizatoru ilə gücləndirilib. Qeyd edək ki, sensor Samsung əməkdaşlığında xüsusilə inkişaf etdirildiyi üçün Redmi Note 12 seriyasına görə yaxşı optimizasiya edilib. Digər kameralar isə mənasız 8MP təsvir ölçülü 119° ultra-geniş bucaqlı, 2MP makro sensorlarıdır. Cihazlardakı selfi kameralarının təsvir ölçüsü 16MP təşkil edir. Qeyd edək ki, 200MP kamera olmasına baxmayaraq maksimum 4K keyfiyyətdə 30FPS video qeydə ala bilirlər.
Smartfonlar arasında Redmi Note 12 Pro+ və YIBO Racing Edition modeli 5000 mAs həcmli batareyaya və 120 Vatt sürətli şarj dəstəyinə sahibdir. Redmi Note 12 Discovery isə 4300 mAs həcmli batareya ilə təchiz olunub, lakin 210 Vatt sürətli şarj dəstəkləyir. Dolby Atmos və Hi-Res standartı dəstəkli Stereo dəstəkli həqiqi səs ucaldanlara, eyni zamanda 3.5mm qulaqlıq girişinə malikdirlər. Android 12 üzərinə MIUI 13 ilə təchiz ediliblər.
Redmi Note 12 seriyasındakı bu 3 modelin qiymətlərinə gəldikdə, Redmi Note 12 Pro+ modelininin başlanğıc qiyməti 304 dollar, Redmi Note 12 Discovery modeli 331 dollar, Redmi Note 12 YIBO Racing Edition modeli 360 dollara təklif edilir.
Redmi Note 12 Pro modeli digər modellərdən nəyi ilə fərqlənir?
Əslində Redmi Note 12 Pro modeli üstdəki 3 model ilə müqayisədə çox fərqlənmir. Gövdəsinin kənarları biraz daha kəskindir, lakin gövdə ölçüləri və dizaynı da birə-bir digər 3 modellə eynidir. Sahib olduğu Dimensity 1080 çipseti və quraşdırılan ekran paneli cəhətdən də Redmi Note 12 Pro modelində dəyişiklik yoxdur. Yeganə potensial fərq ISOCELL HPX 200MP kamera sensorunun Sony IMX766 50MP ilə əvəzlənməsidir. Yəni bu smartfonda 200MP kamera mövcud deyil. Lakin qeyd edək ki, OIS dəstəyi mövcuddur. Digər bir tərəfdən 5000 mAs batareyası 120 Vatt və ya 210 Vatt ilə müqayisədə 67 Vatt sürətli şarj dəstəyinə malikdir. Qeyd edə biləcəyimiz texniki fərqlər bunlardır və cihazın qiyməti 235 dollardan başlayır.
Redmi Note 12 seriyası daxilində son model olan Redmi Note 12 nə ilə fərqlənir?
Sadə Redmi Note 12 modeli isə oxşar dizayna malik lakin, texniki cəhətdən tamamilə fərqli gövdəyə malikdir. 6.67 düymlük Samsung istehsalı (G)OLED adlı 120Hz tezlikli ekrana malikdir. Smartfon öz gücünü Snapdragon 4 Gen 1 çipsetindən alır. Snapdragon 4 Gen 1 ilə bağlı yazdığımız məqaləyə səhifəmizdən keçid edə bilərsiniz. 48MP əsas, 8MP ultra geniş, 2MP dərinlik sensorlarına sahibdir. Kameralarda isə OIS mövcud deyil. 5000 mAs batareyası isə 33 Vatt sürətli şarj dəstəkləyir. Android 12 üzərinə MIUI 13 ilə qutudan çıxır. Redmi Note 12 seriyası daxilindəki sonuncu smartfonun qiyməti 165 dollar təşkil edir.
