Süni intellekt sistemləri demək olar ki, artıq hər birimizin gündəlik həyatda istifadə etdiyimiz texnologiyadır. Süni intellekt sistemlərini hər gün ayrı-ayrı istifadə yerlərində görsək də bu dəfə ki, çox maraqlı və fərqli olub. ABŞ Hərbi Hava Qüvvələri (USF), Lockheed Martin Skunk Works bölməsi və Calspan Korporasiyası ilə birlikdə F-16 qırıcısının modul sınaq versiyası olan VISTA X-62A ilə 17 saatdan çox uçuş həyata keçirib. Qeyd etdiyimiz kimi uçuşu fərqli edən F-16 döyüş təyyarəsinin süni intellekt sistemi ilə idarə olunması idi.
VISTA X-62A döyüş təyyarəsi süni intellektlə idarə olunan ilk taktiki təyyarə kimi qeydə alınıb. Açıq arxitekturası sayəsində yeni modul proqram təminatının tez uyğunlaşdırıla biləcəyi sınaq təyyarəsi Edvards Hərbi Hava Qüvvələri bazasında 20 ilə yaxındır istifadə olunur. Əvvəllər NF-16D olan təyyarə Calspan və Lockheed Martin-in Model İzləmə Alqoritmi (MFA) və Avtonom Simulyasiya İdarəetmə Sistemi (SACS) tərəfindən yenilənmiş VISTA Simulyasiya Sistemi (VSS) ilə təchiz edilmişdir. Bu texnologiyalar təyyarənin avtonom olmasına imkan verir və süni intellekt əsaslı yeni imkanlar təqdim edir. ABŞ Hərbi Hava Qüvvələri süni intellektin və avtonom uçuşun inkişafını sürətləndirməyi hədəfləyir. Bunun üçün VISTA proqramı çox vacib hesab olunur. 17 saatdan çox davam edən süni intellektlə uçuş dekabr ayında başlayan bir sıra sınaqlar çərçivəsində həyata keçirilib.
DARPA-nın press-relizində deyilir: Heç bir ciddi problemlə üzləşmədik, lakin virtualdan canlıya keçid zamanı gözlənilən simulyasiyaya əsaslanan nəticələrlə müqayisədə bəzi fərqlərlə qarşılaşdıq. Bu, təkcə qabaqcıl avtonom imkanların uçuş sınaqlarının yox, VISTA kimi sınaq meydançalarında aparılmasının vacibliyini də vurğulayır.
