Tesla inkişaf etdirdiyi kompüter və proqram təminatı ilə avtonom sürücülük texnologiyalarında həqiqətən də fərqli dövrdədir. 2022-ci ilin dördüncü rübünün maliyyə hesabatı tədbirində çıxış edən Elon Musk maraqla gözlənilən Hardware 4 və Tesla Cybertruck ilə bağlı bəzi yeni açıqlamalar verib. Əvvəlcədən qeyd edək ki, 2021-ci ildə çıxacağı iddia edilən Cybertruck, təxminən 3 ildir gecikir. 2022-ci ilin dördüncü rübünün maliyyə toplantısında Tesla Cybertruck ilə bağlı sualları cavablandıran Elon Musk, “Bu yay istehsal üçün bir addım atacağıq. Lakin yeni modelin kütləvi istehsalı gələn ilə qədər başlamayacaq. İstehsalın başlanması bizim üçün hələ ki, vacib detal deyil.” açıqlamasını verib. Yəni 2021-ci il üçün hədəflənən Cybertruck bu il də satışa çıxarılmayacaq. İndi isə daha vacib olan Tesla elektromobiləri üçün yeni Hardware 4 texniki təminatı barədə məlumat verək
Tesla Hardware 4 texnologiyası yalnız yeni elektromobillər üçün nəzərdə tutulacaq
Full Self Driving proqramı Teslanın bu gün Hardware 3 adlandırdığı texniki təminat ilə işləyir. Texniki təminata isə avtopilotunun işləməsinə imkan verən kompüterdən tutmuş, kameralara qədər bir çox element daxildir. Keçən il hazırlanmağa başlayan 4-cü versiya isə Tesla Cybertruck ilə birlikdə bazara çıxarılacaq. Xatırladaq ki, Elon Musk 2020-ci ildə Cybertruck haqqında olan açıqlamalarında modelin qısa müddət ərzində qayıq kimi fəaliyyət göstərə biləcək qədər suya davamlı olacağını beləliklə, çayları, gölləri və hətta çox hamar dənizləri keçə biləcəyini belə demişdi. Böyül bir ehtimalla buna hazırlıq da şirkətin işini biraz çətinləşdirib.
Belə ki, bir investor Elon Musk-dan avtomobillərin Hardware 4 təminatına yüksəldilib-yüksəldilməyəcəyini soruşdu. Elon Musk mövzu ilə bağlı bu şəkildə açıqlama verib:
“Aparat yeniləməsi təəssüf ki, gündəmimizdə olan bir məsələ deyil. Bunun baş verməməsinin iki əsas səbəbi var. Birinci səbəb odur ki, Hardware 3 və Hardware 4 arasında avtonom idarəetmə performansı baxımından təkmilləşdirmə tələb edən ciddi bir fərqlilik yoxdur. İkincisi, nəqliyyat vasitələrinin sahibləri üçün avadanlığın təkmilləşdirilməsi xərcləri kifayət qədər böyükdür”
Lakin bu açıqlamanın ardıyca qəribə bir məlumat da verilib və performansın artmayacağı biraz şübhəyə səbəb olub. Hardware 3 texnologiyası Full Self Driving proqramı olan sürücülərə nisbətən 200-300% daha yaxşı sürücülük performansı göstərir. Hardware 4 texniki təminatı sayəsində isı bu nisbətin yüzdə 500-600% arasında olacağı iddia edilir. Xüsusilə də bu faiz təhlükəsizlik payının artmasını da xarakterizə edir. Üstəlik Tesla şirkətinin Hardware 4 ilə kameralara da dəyişiklik edəcəyi məlum olub. Belə ki, hal-hazırda istifadə olunan kameralar 1,2MP təsvir ölçüsünə malikdir. Lakin yeni texniki təminatın kameraları Sony IMX490 5MP təsvir ölçüsünə qədər təkmilləşdiriləcək.
Eyni zamanda baxış bucağları da təkmilləşdirilməlidir. Ona görə də sızıntılara əsasən, ön tərəfdə 3 ədəd kamera sensoru 2 ədədə qədər azalacaq. Yeni kameralar eyni zamanda titrəyən LED işıqlandırmalı lövhələrdəki məlumatları görə bilmə, HDR dəstəyi, 10 bit 40FPS qeydə alma qabiliyyəti kimi çeşidli imkanlara malik olacaq. B sütunundakı kameraların baxış bucağı yenilənməkdən əlavə, eyni zamanda isidiləcək. Ön tərəfdəki kameralar üçün də buxar yaranması problemi xüsusi havalandırma kanalları ilə düzəldiləcək. Yəni Tesla şirkəti sözün əsl mənasında Hardware 4 ilə texniki imkanları bildiyimiz və bilmədiyimiz xırda detallarla xeyli təkmilləşdirəcək.
