Samsung şirkəti Galaxy A34 modelini təqdim etməyə hazırlaşır. Smartfonlar təqdim edilməmişdən uzun müddət əvvəl o qədər sızıntılarla qarşılaşırıq ki, yeni çıxacaq modelin xüsusiyyətləri haqqında çox az sürpriz qalır. Galaxy A34 modelinin bütün əsas texniki xüsusiyyətləri və dizaynı açıqlanıb. Əlbəttə ki, hazırda bütün diqqətimiz Galaxy S23 seriyasında və onun 1 Fevralda keçiriləcək Unpacked tədbirindədir. Bununla belə, Samsung şirkətinin tədbirdən əvvəl başqa bir smartfonu, yəni Galaxy A34 5G modelini Hindistanda təqdim edəcəyi deyilir.
Galaxy A34 bu yaxınlarda Federal Rabitə Komissiyasının (FCC) verilənlər bazasında SM-A346M kod adı ilə görünüb. Smartfon daha əvvəl MediaTek Dimensity 1080 çipseti ilə Geekbench verilənlər bazasına daxil olmuşdu. Lakin bəzi bazarlarda smartfonun Exynos 1380 çipseti ilə də çıxarılacağı ehtimalı mövcuddur. İlkin ehtimallara görə Dimensity 1080 çipsetli variant yalnız Amerika və Cənubi Koreya üçün nəzərdə tutulub. Digər ölkələr isə yalnız Exynos 1380 çipsetinə sahib variantı əldə edəcəklər. Exynos 1380 üçün erformans baxımından təqribən deyə bilərik ki, Dimensity 1080 çipsetinə yaxın və Snapdragon 778G çipsetinin gerisində nəticəyə malik olmalıdır.
Yuxarıda qeyd etdiyimiz kimi son bir ayda yeni detallar üzə çıxdı və Galaxy A34 modelinin render görüntüləri də sızdırıldı. Bununla A34 5G modelinin sahib ola biləcəyi kamera imkanları haqqında da daha çox öyrəndik. Galaxy A34 modeli 90 Hz tezlikli 6,5 düymlük AMOLED ekran paneli ilə təqdim ediləcək. Smartfonun arxa tərəfində 48MP əsaslı üçlü kamera konfiqurasiyası olacaq. Ön tərəfdə isə 13MP selfi kamerası “infinty-u” dizayn konseptində bizləri qarşılayacaq.
Federal Rabitə Komissiyasının məlumatına görə, Galaxy A34 modeli 25 Vt sürətli şarj ilə dəstəklənən 5000 mAs batareya ilə gələcək. Qiymət etiketi ilə bağlı heç bir məlumat olmayan cihazın dörd fərqli rəngdə təqdim ediləcəyi gözlənilir. Təqdim olunma tarixi kimi bu ilin birinci rübü göstərilir. Smartfonun qiymət etiketi bəlli olmasa da qiymətin daha əvvəlki model olan Samsung Galaxy A33 modelinə yaxın və ya cüzi yüksək olacağı gözlənilir.
