Elektrikli avtomobil satışının gündən günə artdığı zamanda bütün ölkələrdən daha öndə gedən bir ölkə var. Bəli, söhbət Norveçdən gedir. Digər ölkələr tamamilə elektrikli avtomobil satışına keçməyi 2030-2035 il aralığına hədəfləyir. Amma Norveç üçün bu belə deyil. Belə ki, Norveç 2025-ci ilə qədər ölkədə yalnız elektrikli avtomobillər satılmasını hədəfləyir. Lakin görünən budur ki, Avropanın ən şimal nöqtəsində yer alan Norveç bu hədəfinə daha tez çatacaq.
Satılan 10 avtomobildən 9-u elektrikli avtomobildir
Son statistikaya görə, Norveçdə satılan avtomobillərin 89,3%-lik hissəsi elektriklə işləyir. Bu avtomobillərin 81,6%-i tam elektriklə, 7,7%-i isə şarj oluna bilən (plug-in hibrid) elektriklə işləyən avtomobillərdir. Digər tərəfdən, Norveçdə tam elektriklə işləyən avtomobillərin satışı illik müqayisədə 7,8% artarkən, hibrid avtomobillərin satışı isə təxminən 10% azalıb.
Son məlumatlara görə, Tesla Model Y bütün Avropada olduğu kimi Norveçdə də ən çox satılan elektrikli avtomobildir. Ondan sonra Volkswagen ID.4 modeli sıralamada öz yerini alır. BMW i4 isə sıralamada üçüncü yerdədir.
Şəkildə də gördüyünüz kimi satış rəqəmlərinə görə ikinci və beşinci yerdə olan Volkswagen ID.4 və VOLVO XC40 modelləri arasında elədə böyük fərq yoxdur. İlk sırada yer alan Tesla Model Y isə rəqiblərindən 3 dəfə daha çox satılmış vəziyyətdədir. Əlbəttə ki, növbəti aylar ərzində bu rəqəmlərin daha sürətlə artacağı və Norveçin 2025-ci il hədəfinə daha tez çatacağı aydın görünür.
Ölkədə benzinli avtomobillərin satışı bu qədər aşağı düşərkən və elektrikli avtomobillər bu qədər artarkən əlbəttə ki, bu vəziyyət istehsalçıların da qərarlarına təsir edib. Belə ki, Hyundai Norveçdə yalnız elektrikli avtomobil satışına başlayıb.
Hyundai, Norveç üçün yalnız elektrikli avtomobillər satacağını açıqlayıb
Hyundai bundan sonra Norveçdə tam elektrikli avtomobillər satacaq. Bu qərar hibrid avtomobilləri də əhatə edir. Şirkət artıq 2020-ci ildən etibarən ölkədə daxili yanma mühərrikli avtomobillərin satışını dayandırıb və tam elektrik və ya hibrid avtomobillərin satışına başlayıb. İndi isə yalnız tam elektrikli avtomobillər satacaq.
Hyundai Norveçin baş direktoru Tomas Rosvold deyib: “Bizim öz model portfelimizə inancımız böyükdür və indi tamamilə yeni IONIQ 6-nı təqdim etdik, Norveç bazarında yalnız tam elektrikli avtomobillər satmağın vaxtı çatıb”.
Hyundai Norveçin baş direktoru Tomas Rosvold deyib:
“Bizim öz model portfelimizə inancımız böyükdür və indi tamamilə yeni IONIQ 6 modelini də təqdim etdik, Norveç bazarında yalnız tam elektrikli avtomobillər satmağın vaxtı çatıb”.
Şarj oluna bilən hibrid modellər, Hyundai şirkətinin 2022-ci ildə satışlarının 7%-ni təşkil edirdi və son illərdə Norveç satışlarının 90%-dən çoxunu elektrikli avtomobillər təşkil edirdi. Norveç isə Hyundai şirkətinin bu vaxtdan sonra yalnız tam elektrikli avtomobillər satacağı ilk bazardır. Volkswagen də 2024-cü ildən ölkədə yalnız elektrikli avtomobillərin satışına başlayacaq.
