2022-ci ili geridə qoysaqda keçən ildə texnologiya dünyasındakı varlı şəxslərin sərvətlərində böyük itkilər yaşandı. Bloomberg tərəfindən paylaşılan texnologiya dünyasında ən çox sərvət itirən şəxslər statistikasında çox tanınan bəzi adlar diqqət çəkir.
Sərvətində ən çox itki müşahidə edilən şəxs Tesla, SpaceX və Twitter şirkətlərinin sahibi Elon Musk-dır. Musk 2022-ci ildə haqqında ən çox danışılan şəxslərdən idi. 44 milyard dollara Twitter şirkətini alan Elon Musk bunu etmək üçün 23 milyard dollarlıq Tesla hissələrini əldən çıxarmışdı. Bir il ərzində şirkətin səhmləri 70% ucuzlaşdı və sərvətinin 133,3 milyard dollarını itirdi. Texnologiya dünyasında ən çox itirən şəxslər sırasında olan Elon Musk artıq dünyanın ən varlı adamı olmasa da, 137 milyard dollarlıq sərvətlə ABŞ-ın ən varlı adamı olmağa davam edir.
2022-ci ildə texnologiya dünyasında ən çox itirən şəxslər arasında Amazon və Blue Origin kosmik turizm şirkətinin sahibi Jeff Bezos da var. Bezos bu il 85,4 milyard dollar itirib. 107 milyard dollarlıq sərvətlə dünyanın 6-cı ən varlı adamı olan Bezosun sərvətini itirməsi 2021-ci ilin iyulunda başlayıb. 2022-ci ilin iyul ayında Jeff Bezos CNN International-a verdiyi müsahibədə sərvətinin böyük hissəsini xeyriyyə təşkilatlarına bağışlamağı planlaşdırdığını bildirib.
Bezos əslində 2017-ci ildə Microsoft qurucusu Bill Gates-i geridə qoyaraq ilk dəfə dünyanın ən varlı adamı oldu. Həmin vaxt onun sərvəti 90 milyard dollardan çox idi. 2017-ci ildən bəri Bezosun sərvəti təxminən 100 milyard dollar artıb, bu da onu Tesla və SpaceX-in baş direktoru Elon Musk-dan sonra dünyanın ikinci ən zəngin insanı etdi. Bezos 57 yaşında Amazon şirkətindən təqaüdə çıxdı və bütün diqqətini Blue Origin fəaliyyətlərinə yönəldəcəyini açıqladı.
Siyahıda üçüncü yerdə dünyanın ən böyük kriptovalyuta birjası Binance-in qurucusu Chanpeng Zhao qərarlaşıb. Zhao bu il 83,3 milyard dollar itirib. Chanpeng Zhao-nun hazırkı sərvəti 12,6 milyard dollardır. Chanpeng Zhao iyun ayında mövzu ilə bağlı verdiyi müsahibədə sərvətinə dair rəqəmlərin necə ortaya çıxdığı barədə heç bir fikrinin olmadığını bildirdi. Hətta qeyd edib ki, “Əslində, o qədər də var-dövlətim yoxdur. Bu rəqəmlərin heç birinə yaxın da deyiləm”.
Texnologiya dünyasında ən çox itirən şəxslər sırasında dördüncü yerdə son zamanlarda haqqında çox danışılan, Meta və Facebook-un qurucusu Mark Zuckerberg gəlir. 2022-ci ildə 79,9 milyard dollar itirən Mark-ın sərvəti 45,6 milyard dollar oldu. Mənbələr bildirir ki, Zuckerberg 2021-ci ilin sentyabrından bəri sərvətinin yarıdan çoxunu itirib. Bu itkiyə səbəb kimi Meta səhmlərinin düşməsi göstərilir. O, 2015-ci ildən bəri yer aldığı “dünyanın ən zəngin 10 adamı” siyahısındakı yerini itirdi.
Bill Gates sərvətindən 28,9 milyard dollar itirməklə texnologiya dünyasında itirən şəxslər siyahısındakı ilk 10 şəxsdən biridir. 109 milyard dollarlıq sərvəti ilə o, Bloomberg Milyarderlər İndeksində 4-cü yerdədir. Bill Gates-in sərvətini itirməsinin səbəbi budur ki, 2022-ci ilin iyul ayında bütün var-dövlətini keçmiş həyat yoldaşı ilə birlikdə başlatdığı Bill və Melinda Gates Fonduna verməyi planlaşdırıb. Ukraynadakı müharibənin də səbəb olduğu uğursuzluqları və digər amilləri əsas gətirən Gates bu ay fonda 20 milyard dollar bağışladığını açıqlamışdı. Məşhur milyarder gələcəkdə bütün sərvətini Bill və Melinda Gates Fonduna bağışlayacağını və bu fondun onu dünyanın ən varlı adamları siyahısından çıxaracağını bildirib.
