Samsung şirkəti gələcəyin ən mühim sahəsindən çəkilmək qərarı alıb. Söhbət elektromobil bazarından gedir. Çin mənşəli brendlər dayanmadan bir-birindən fərqli elektrikli avtomobillər istehsal edirlər. Hətta Apple belə öz elektromobilini hazırlamaqla bağlı işlər aparır. Lakin görünən odur ki, firma üçün işlər istənilən səviyyədə getmir.
Samsung nəyə görə elektromobil bazarına daxil olmaq istəmir?
Bu ilin əvvəli Cənubi Koreya nəhənginin elektrikli avtomobil istehsal edəcəyi ilə bağlı müxtəlif informasiyalar ortaya çıxmışdı. Hətta şirkət uzun müddətdir ki, çox sayda avtomobil istehsalçısına komponent hazırlamaq və satmaqla məşğul olur. Buna görə də firma üçün öz elektromobilini istehsal etmək o qədər də çətin olmamalıdır.
The Korea Times jurnalı şirkətin adı çəkilməyən iki yüksək vəzifəli şəxsindən müsahib alıb. Həmin şəxlərin verdiyi məlumata görə firma elektromobil layihəsini dayandırır. Bunun səbəbi elektrikli avtomobil bazarında Samsung-un uğur qazanmasının çətin olacağı göstərilir. Aparılan araşdırmalar və dəyərləndirmələr şirkətin rəhbər heyətini razı sala bilməyib. Elektromobil istehsalına başlamaq qaynaqların böyük miqdarda azalmasına səbəb olacaq. Ona görə də rəhbər heyət elektrikli avtomobil istehsalına ciddi məbləğ ayırmağı məntiqli görmür. Şirkət üçün sabit və davamlı gəlir daha vacibdir. Digər bir tərəfdən smartfon sektorunda da rəqabət çətinləşir.
Digər avtomobil istehsalçılarına texnoloji avadanlıqların təmin edilməsi isə öz axarında davam edəcək. Samsung şirkətinin hal-hazırda Tesla, Rivian, Hyundai, BMW və.s kimi tanınmış markalarla əməkdaşlığı mövcuddur. Hansı ki, firma bu markalar üçün kamera sensorları, yaddaş kartları, ekran panelləri, avtonom idarə etmə çiplərinin təminatçısı rolunu oynayır.
Əslində şirkətin ilk avtomobil konsepti 1997-ci ildə Seul Motor Show sərgisində göstərilmişdi. Təəssüf ki, SSC-1 modeli elə konsept olaraq qaldı. Avtomobilə 2.5 litr həcmli 6 silindirli mühərrik quraşdırılmışdı. Ardıyca 1998-ci ildə Renault ilə əməkdaşlığa başlanıldı. İndiyə qədər bu əməkdaşlıq davam etdirilir. Hər il bəzi Renault modelləri fərqli adlarla Renault-Samsung brendinə məxsus yeni avtomobil kimi satışa çıxarılır. Məsələn, Renault Talisman modeli bunun üçün ən yaxşı nümunələrdən biridir.
Nəticədə elektromobil bazarında çox markanın olması alıcılar üçün müsbət haldır. Lakin hələlik Samsung firması özünü bu sektorda görməyə hazır hiss etmir. Ümid edirik gələcəkdə şirkət bu addımına görə peşman olmayacaq.
