Bu ilin oktyabr ayında Apple şirkətinin yeni nəsil Mac Pro modeli barədə məlumat ortaya çıxmışdı. Məşhur Bloomberg resursunun analitiki və redaktoru olan Mark Qurman, qarşıdan gələn Mac Pro kompüterlərinin yeni nəsil gücləndirilmiş M2 seriyası prosessorlar ilə təchiz ediləcəyini bildirmişdi. Onun sözlərinə görə Mac Pro modeli 2 fərqli variantda təchiz edilmiş M2 Ultra və M2 Extreme prosessorları ilə təchiz edilməli idi. Lakin elə bu gün yenə Bloomberg tərəfindən verilən məlumata görə Apple şirkəti bu prosessorların ən üst variantı olacaq M2 Extreme variantından imtina edib.
Mark Qurman, yeni nəsil Mac Pro modelində M2 Extreme prosessorunun quraşdırılmayacağını qeyd edib
Daha əvvəl M2 Extreme prosessorunun 48 nüvəli CPU və tam olaraq 152 nüvəli GPU ilə təchiz ediləcəyi ortaya çıxmışdı. Lakin hal-hazırda iddialara görə xərclərin çox olması və prosessorun seriya istehsalının çətinləşməsi bu qədər qüvvətli prosessorun ləğv edilməsinə səbəb olub. Qeyd edilir ki, Apple şirkəti TSMC tərəfindən bu prosessor üçün aldığı qaynaqları digər prosessor və mobil çipsetlərinin istehsalı üçün yönləndirəcək.
Digər bir tərəfdən Apple şirkətinin prosessorları üçün olan planları da istənildiyi kimi irəliləmir. Çünki, plana görə bu ilin noyabr ayına qədər bütün Apple kompüterləri Apple M seriyası prosessorlara keçid etməli idi. Lakin Apple şirkəti yeni nəsil Apple M prosessorlarını təməl alan Mac Pro və Mac Mini kompüterlərini istehsal etməyi bacarmadı.
Uyğun olaraq M2 Ultra prosessorunun istehsalının isə baş tutacağı gözlənilir. Bu prosessor 24 ədəd CPU nüvəsinə və 76 ədəd GPU nüvəsinə sahib olub 192 GB operativ yaddaşla təchiz ediləcək. M2 Pro əsaslı Mac Mini modeli və M2 Ultra əsaslı Mac Pro modelləri isə növbəti ildə təqdim ediləcək. M2 Pro və M2 Max prosessorları ilə gücləndiriləcək 14 və 16 düymlük MacBook Pro 2023-cü ilin əvvəllərində satışa çıxarılacaq. M3 Prosessorlu iMac modeli isə növbəti ilin sonuna qədər çıxarılmayacaq.
