Volkswagen brendi Alman avtomobil nəhənglərindən biri olsa da ofis stulunu yüksək texnologiyalı “elektromobilə” çevirib. Belə ki, bu ofis stulu elektrik mühərriki, faralar, siqnal, əyləncə sistemi hətta qoşqu bağlayıcı qurğu ilə də təchiz edilib. Şirkət bu stulu günün əksər saatlarını masa qarşısında keçirən işçilər üçün hazırladığını vurğulayıb. Lakin elektrikli ofis stuluna müəyyən tələbat yaransa belə onun satışa çıxarılma ehtimalı çox azdır. Çünki, bu stul bir növ PR aləti kimi istifadə olunmaqdadır.
Volkswagen şirkətinin yeni elektrikli ofis stulunun xüsusiyyətləri
Alman avtomobil nəhənginin hazırladığı elektrikli ofis stulu insanlar tərəfindən maraqla qarşılanıb. Hətta insanlar belə bir stula ehtiyaclarının olduğunu bildiriblər. Qeyd etdiyimiz kimi, bu yüksək texnologiyalı ofis stulu elektrik mühərriki ilə təchiz olunub və mühərrik vasitəsilə stul 20 km/saat sürətinə çata bilir. Ofis stulu yüngül lehimli diskli təkərlər üzərində hərəkət edir. Həmçinin stula quraşdırılmış qol dayaqları LED və RGB işıqlar ilə təchiz olunub. Bu qol dayaqları işıqlardan əlavə olaraq multimedia sistemi ilə təchiz olunub. Stulun dizaynına görə bəziləri onu oyunçu stuluna da bənzədir. Bundan əlavə ofis stulu daxili oturacaq isidicisi ilə də təchiz olunub.
Üstəlik avtomobillərin ən vacib xüsusiyyətlərindən biri olan “baqaj“, bu elektrikli stulda da mövcuddur. Belə ki, istifadəçi bu yük yerinə noutbuk, sənədlər və bəzi aksesuarları yerləşdirə bilər. Əlavə olaraq qeyd edək ki, stulun hər tərəfi yaxınlıq sensorları ilə təchiz olunub. Hətta arxaya vermək üçün avtomobillərdəki kimi park kamerasını da görmək mümkündür. Yüksək texnologiyaya malik bu ofis stulu istifadəçilərinə 12 km yürüyüş məsafəsi vədd edir. Bu isə evdə və ya ofisdə kifayət etməlidir. Şirkətin xüsusilə furqonlarını reklam etmək üçün hazırladığı PR aləti satışa çıxarılmasa belə, istifadəçilərin olduqca marağını cəlb etməyi bacarıb.
