Məşhur Çin avtomobil brendi olan Geely, 2021-ci ildə Zeekr brendini təsis etmişdi. Belə ki, şirkətin Zeekr brendini yaratmaqda məqsədi elektromobil bazarına daxil olmaq idi. Zeekr brendi ötən gün yeni elektromobili olan Zeekr 009 modelini təqdim edib. Bu, brendin Zeekr 001-dən sonra təqdim etdiyi 2-ci modelidir. Ümumiyyətlə brend yeni təsis olunmasına baxmayaraq Çində böyük maraq doğurub.
Zeekr 009 elektromobilinin texniki xüsusiyyətləri
Ötən gün Çində təqdim olunmuş Zeek 009 elektromobili futuristik görünüşü ilə fərqlənən 6 nəfərlik minivan modelidir. Elektromobilin dizaynına nəzər saldıqda ön tərəfdə elektromobilin zəhminə zəhm qatan olduqca nəhən nəhəng radiator barmaqlığına bənzəyən hissə yerləşir. Lakin elektromobildə dizaynı qeyri-adi edən bu hissə gecə xüsusi LED işıqlandırma ilə möhtəşəm görünüş əldə edir. Belə ki, qısa və düz olan kapotun önündə yerləşən farların hər biri beş müxtəlif işıqlandırma elementindən ibarətdir. Arxa tərəfə doğru isə bu zəhmli görünüş davam edir. Arxa əyləc işıqlarına yaxından baxdıqda isə Zeekr 001 ilə oxşarlıq təşkil etdiyi müşayiət edilir. Qeyd edək ki, elektromobilin dizaynı Stefan Sielaff-ın rəhbərliyi altında Geely komandası tərəfindən hazırlanıb. Bu şəxs, daha əvvəl Mercedes və Audi şirkətlərində fəaliyyət göstərmişdir. Mercedes ilə Geely şirkətinin elektromobil sektorunda yaxın bağlara sahib olduğunu nəzərə alsaq, bu şəxs bizi elə də təəccübləndirməməlidir.
Elektromobilin interyerinə baxdıqda 15.6 düymlük sensor ekranı görmək mümkündür. Zeekr 009 elektromobili 7 ədəd 4MP HD kamera, 4 ədəd 2MP ətraf mühit kamerası, 12 qısa mənzilli radarla təchiz olunub. Elektromobilə əlavə edilmiş yeni funskiyalardan biri də ICC yəni avtomobil daxili rabitə funksiyasıdır. Belə ki, bu funksiya ilə 2-ci və 3-cü cərgədə əyləşən sərnişinlər sürücü ilə elektromobilin salonuna quraşdırılmış mikrofon vaxsitəsi ilə danışa bilər.
Elektromobil iki versiyada istifadəçilərə təqdim olunur. Belə ki, hər iki versiya 2 tam ötürücülü elektrik mühərrik ilə təchiz olunub. Elektrik mühərriki 534 at gücü hasil edir. Elektromobil 100 km/saat sürətinə 4.5 saniyəyə sürətlənə bilir. İki versiya arasındakı fərq isə batareya paketləri cəhətdən ortaya çıxır. 116 kVts batareyaya sahib variantı təqribi 702 Km, 140 kVts batareyaya sahib variantı təqribi 822 Km yürüyüş məsafəsinə sahibdir.
Elektromobilin maksimum sürəti isə 190 km/saat-dır. Zeekr 009 elektromobilinin gövdə uzunluğu 5209 mm, eni 2024 mm və hündürlüyü isə 1856 millimetrdir. Həmçinin elektromobilin təkər bazası 3205 mm təşkil edir. Elektromobilin boş çəkisi isə 2830 kq-dır. Elektromobilin təkər diskləri 20 düymdür. Elektromobilin qiyməti modifikasiya dəyişikliyinə əsasən, 69.400-81.800 avro arasında dəyişəcək.
