Xiaomi 13 Pro modelinin texniki xüsusiyyətləri barədə məşhur insayder Yoqeş Brar Twitter üzərindən ən son detalları paylaşıb. Yoqeş Brar bir çox markaların smartfonları haqqında verdiyi xəbərlərlə tanınır. Brarın verdiyi məlumatlar isə əvvəlcədən gözlədiyimiz və təxmin etdiyimiz bir çox detalı təsdiqləyir. Texniki xüsusiyyətlərdə ən diqqət çəkən məqam isə smartfonun kamera parametrləri olub.
Belə ki, Çin texnologiya nəhəngininin yeni nəsil premium smartfonu LTPO texnologiyasına malik 6,7 düymlük 120Hz adaptiv tezlikli E6 AMOLED ekrana sahib olacaq. Smartfon öz gücünü Qualcomm Snapdragon 8 Gen 2 çipsetindən alacaq. Smartfonun 8 GB RAM və 12 GB RAM olmaqla iki fərqli versiyada satışa çıxarılması gözlənilir. Bu versiyalar isə müvafiq olaraq 128 GB, 256 GB və 512 GB daxili yaddaş ilə təchiz olunacaq.
Xiaomi 13 Pro smartfonu 3 arxa kamera sensoru ilə təchiz olunacaq. Ən diqqət çəkən məqam da buradadır ki, smartfonun əsas kamerası Xiaomi 12 Ultra ilə birə-bir eyni sensora malikdir. Söhbət Sony IMX989 50MP nəhəng 1 düymlük kamera sensorundan gedir. 50MP ultra geniş bucaqlı və nəhayət 50MP telefoto kamera sensorlarla üçlü kamera konfiqurasiyası tamamlanır. Smartfonun ön tərəfində isə 32 MP təsvir ölçülü selfi kamerasını görmək mümkün olacaq. Bu kamera Leica tərəfindən təkmilləşdirilmiş texnologiyaları özündə birləşdirəcək.
Maraqlı bir məlumat kimi qeyd edək ki, Xiaomi və Sony şirkətləri IMX989 sensorunun hazırlanmasında birgə fəaliyyət göstərib. İlk dəfə Xiaomi 12S Ultra modelinə quraşdırılan bu sensorun inkişafına və istehsalına sərf edilən məbləğ təxminən 15 milyon dollar həcmində qiymətləndirilir.
Cihazın təqdim edildikdən sonra Android 13 əsaslı MIUI 14 əməliyyat sistemi ilə qutudan çıxacaq. Xiaomi 13 Pro modeli 120 Vatt sürətli şarjı dəstəkləyən 4800 mAs batareya həcmi ilə təchiz ediləcək. Bu böyük həcmli batareya, çox güman ki, simsiz və tərs enerji doldurma texnologiyalarına sahib olacaq. Bu enerji doldurma texnologiyaları Surge C2 və P2 çipsetləri vasitəsi ilə idarə olunacaq. Ona görə də cihaz batareya sağlamlığına bu çiplər ilə əlavə nəzarət edə biləcək. Təqdimat tədbirinin bu ay ərzində və ya ən gec dekabrda baş tutacağı gözlənilir.
