Jeep hazırda Stellantis şirkətinə məxsus Amerika avtomobil markasıdır. 1987-ci ildə Stellantis, Jeep markasını əvvəlki sahibi olan American Motors Corporation şirkətindən alıb. Jeep markasının ilk modeli 1941-ci ildə təqdim olunmuş Bantam’s BRC 40-dir. Bu model 2-ci dünya müharibəsi dövründə ABŞ ordusunun sifarişi ilə hazırlanmışdır. Bu 4×4 model həm yüngül, həm də çevik olduğu üçün ABŞ ordusu tərəfindən kütləvi olaraq sifariş olunmağa başladı. Jeep markasının dünyada tanınması da elə məhz həmin dövrdən başlayır.
Mopar şirkəti ötən gün Las-Veqasdakı SEMA 2022 sərgisində Jeep markasının yeni CJ Surge konsept elektromobilini təqdim edib. Mopar CJ Surge konsepti ilə yanaşı Ram 1500 Backcountry X və TRX Gold Shot konseptlərini də təqdim edib. Lakin bu konsept modellər arasında ən cəlb edicisi elektrikli CJ Surge olub.
Jeep CJ Surge konsept elektromobili dizayn olaraq CJ-7 modelinin yenilənmiş halıdır. CJ Surge 4×4 elektromobili Jeep brendinin həvəskarları üçün maraqlı olacaq. Yeni modelin texniki xüsusiyyətləri arasında yalnız iki pilləli ötürmə qutusu vasitəsilə gücləndirildiyi və 200 kVt elektrik ötürücülü mühərrikə sahib olduğu məlumdur. Bu elektrik mühərriklərinin təqribən 268 at gücü hasil etdiyi bildirilir. Həmçinin elektromobil 24 modullu Li-ion batareya paketi ilə təchiz olunub. Belə ki, bu batareya paketini modelin sərnişin bölməsinin arxa hissəsində görmək mümkündür. Lakin təəssüf ki, elektromobilinin batareya paketinin həcmi və ümumilikdə elektromobilin yürüyüş məsafəsi barədə dəqiq bir məlumat verilməyib.
