Bu gün süni intellekt texnologiyaları bir çox sahədə istifadə olunur. Belə ki, texnologiya, avtomobil və digər sahələrdə bir çox nəhəng şirkət süni intellekt texnologiyalarından istifadə edərək daha çox mənfəət əldə edir. İndi isə alimlərin apardığı müşahidələr nəticəsində məlum olub ki, süni intellekt şəhər planlaşdırılmasında da uğurludur. Maraqlısı budur ki, süni intellekt gələcəkdə urbanizasiya və məhsuldar şəhər ərazilərinin yaradılmasında əsas rol oynaya bilər. Çinin Tsinghua universitetinin tədqiqatçıları tərəfindən aparılan araşdırmaya görə, süni intellekt bir çox meqapolisin dizaynını təkmilləşdirə bilər.
Bundan əlavə alimlər iddia edir ki, süni intellekt texnologiyaları şəhər planlaşdırılmasında insanlardan daha uğurludur. Belə ki, süni intellekt hazırda mövcud olan şəhərlərin planlarını təkmilləşdirə və ya sıfırdan yeni şəhər qura bilər. Maraqlısı budur kİ, süni intellekt yalnız uğurlu plan qurmur, həm də bu işi mümkün qədər qısa müddətdə, ən effektiv versiyada edir. Avtomatlaşdırma üzrə ekspert Yu Zheng-in rəhbərlik etdiyi elm adamları 3 sahədə insanların şəhərsalma planlarını üstələyə bilən süni intellekt sistemi hazırlayıb. Hətta bu süni intellekt sistemi insanlardan nə az, nə çox 50% uğurlu nəticə göstərir.
Süni intellekt fəaliyyətə sadəcə bir neçə kvadrat kilometr sahəsi olan kiçik şəhərlərin modelləşdirilməsi ilə başlayır. 2 gün davam edən təlimdə süni intellekt sistemi bütün əsas ehtiyacların ən optimal istifadə olunma üsullarını təklif edib. Belə ki, buraya nəqliyyatın axını, piyada yollarının müəyyənləşdirilməsi, yaşıl ərazilərin müəyyənləşdirilməsi və təbii ki, binaların arxitekturası daxildir. Süni intellekt insanların şəhər planlaşdırılmasına sərf etdiyi vaxtı ciddi şəkildə azalda bilər.
