Dünyanın ən böyük axtarış mühərrikinə sahib olan Google şirkəti süni intellekt əsaslı Google axtarış xidmətinin artıq istifadəyə hazır olduğunu bildirib. Belə ki, Search Labs üzərindən qeydiyyatdan keçən istifadəçilər artıq süni intellekt ilə işləyən axtarış sistemindən istifadə edə biləcək. Xatırladaq ki, texnologiya nəhəngi ötən günlərdə baş tutan I/O 2023 tədbirində axtarış sisteminə süni intellekt dəstəyi gətirəcəyini bildirmişdi. Tədbirdə yeni funksiyanın nə zaman istifadəyə veriləcəyi açıqlanmasa da, bu gün inqilabi yeniliklər ilə əlaqəli əhəmiyyətli inkişaf olduğu ortaya çıxıb.
Qeyd etdiyimiz ki, texnologiya nəhəngi süni intellekt əsaslı Google axtarış sistemindən istifadənin mümkün olduğunu bildirib. Belə ki, ABŞ-da yaşayan və Search Labs üzərindən qeydiyyatdan keçən istifadəçilər növbə ilə yeniliklərdən istifadə edə biləcək. Google şirkətinin rəsmi səhifəsində yeni axtarış xidmətinin Android, iOS və Web platformalarında əlçatan olacağı bildirilib. Ümumiyyətlə süni intellekt dəstəkli axtarış xidməti istifadəçilər üçün mükəmməl imkanlar təqdim edəcək.
Son dövrlərdə Microsoft şirkətinin Bing axtarış mühərriki üzərində etdiyi yeniliklər məhz Google şirkətini də yenilik etməyə vadar edib. Belə ki, süni intellekt üzərində üstünlüyü ələ keçirmək üçün texnologiya nəhəngləri mübarizəni davam etdirir. Qeyd edək ki, Microsoft ötən günlərdə Bing axtarış mühərrikinin standart axtarış mühərriki olması ilə bağlı FireFox ilə müqavilə bağlamışdı. Müqavilədən əvvəl isə FireFox Google axtarış mühərrikindən istifadə edirdi. Yaxın günlərdə süni intellekt əsaslı Google axtarış xidmətlərinin hərkəs üçün istifadəyə veriləcəyi gözlənilir.
