Pekində keçirilən “RoBoLeague” Dünya Robot Futbol Liqasında insanabənzər robotlar üç-üç futbol matçında öz bacarıqlarını nümayiş etdiriblər. Tsinghua Universitetinin Vulcan Komandası ilə Pekin İnformasiya və Elm Texnologiyaları Universitetinin Blaze Light Team komandası arasında keçirilən yarımfinal matçında robotlar heç bir insan köməyi olmadan tamamilə süni intellekt nəzarəti altında sahəyə çıxıblar. Beləliklə, süni intellekt əsaslı insanabənzər robotlar boks-dan sonra bu dəfə də futbol oynayaraq diqqət cəlb ediblər.
Ümumiyyətlə, robotların futbol oynadığını görən və ya eşidən hər kəsin ağlına bir sual gəlir ki, topa vura bilirlər? Cavab isə sadədir bəli. Amma təbii ki, bir çox sahədə olduğu kimi robotlar fubolçuların işini əlindən alacaq qədər inkişaf etməyiblər. Futbol oynamağa gəldikdə robotlar hələ də kifayət qədər həvəskardırlar. Bəziləri nə baş verdiyini anlamır, bəziləri isə çox içibmiş kimi səndələyir. Yenə də onları izləmək olduqca əyləncəlidir. Onlar tez-tez yıxılsalar da, insan futbolçulardan fərqli olaraq, “saxtakarlıq etmədən” dərhal ayağa qalxırlar. Əslində, onların bəzi hərəkətləri futbolla əlaqəsi olmasa da, oyundakı dəyişikliklərə tez reaksiya vermələri heyranedicidir.
Təbii ki, müsabiqənin məqsədi sadəcə əylənmək deyil. Çin bu liqa ilə robot texnologiyasındakı inkişafları nümayiş etdirməyi hədəfləyir. Bu sahədə indiyə qədər istehsal edilən robotlar tarazlıq, sürət, strateji qərar qəbul etmə və yıxıldıqdan sonra sağalma kimi qabiliyyətləri ilə seçilməyi bacarıb. Bu təşkilat həm də gələn il Pekində keçiriləcək Ümumdünya Humanoid Robot Oyunlarının məşqidir. Bütün dünyada əsas məqsəd robotları iş yerlərində və evlərdə istifadə edə biləcəyimiz səviyyəyə çatdırmaqdır. Hələlik sadəcə top qovurlar, amma kim bilir, bəlkə bir gün qol sevincini belə yaşayarlar.
