Texnologiya nəhəngləri indi kütləvi olaraq artan süni intellekt texnologiyalarının elektrik enerjisi qıtlığına səbəb ola biləcəyi ilə bağlı xəbərdarlıq edir. Belə ki, ARM prezidentinin sözlərinə görə süni intellekt 2030-cu il kimi yaxın tarixdə ABŞ elektrik enerjisinin dörddə birini istehlak edə bilər. Ümumiyyətlə, ChatGPT süni intellekt çatbotunun hər sorğu üçün Google axtarış sistemindən 10 dəfə çox enerji sərf etdiyi bildirilir.
Hər keçən gün fərqli süni intellekt alətləri ortaya çıxır. Maraqlısı budur ki, hər bir süni intellekt müəyyən təlim mərhələsini keçdikdən sonra istifadəçilər tərəfindən istifadə olunur. Lakin bu mərhələdə süni intellekt təlimi üçün getdikcə daha çox enerji istehlak olunur. Bəzi hesablamalar görə, bu sürətlə, 2030-cu ilə qədər süni intellekt ABŞ-ın bütün elektrik enerjisinin dörddə birini istehlak edə bilər. ARM prezidenti Rene Haas bildirib ki, ABŞ-da süni intellekt sənayesi dörddə bir miqdarında artıb və indi ölkənin ümumi gücünün 4%-ni təşkil edir.
Sözsüz ki, yeni çiplər daha çox enerjiyə qənaət etməyə başlayıb, lakin yenədə çiplər bu prosesi sadəcə biraz ləngidə bilir. Beynəlxalq Enerji Agentliyinin əvvəlki hesabatında deyilirdi ki, ChatGPT hər sorğu üçün təxminən 2,9 Vt/saat elektrik enerjisi istehlak edir ki, bu da Google-un cari axtarış sisteminin ehtiyacından 10 dəfə çoxdur. Belə ki, əgər süni intellekt Google axtarış sisteminin avadanlıq və proqram təminatını tamamilə əvəz etsəydi, təkcə Google ildə ən azı 11 TWh elektrik enerjisi istehlak edərdi.
