Son vaxtlarda texnoloji məhsulların sağlamlıq sektoruna tətbiq edilməsi ilə bağlı bir çox yenilikləri müşahidə etmək mümkündür. Bunlardan əsası biotexnologiyalar hesabına canlılar və insan üzərində fiziki cəhətdən tətbiq oluna bilən yenilikləri əhatə edir. Lakin eyni zamanda alimlər süni intellekt sistemlərini də yavaş-yavaş bu sahəyə qatmağa davam edirlər ki, stomotoloji sahədə bununla bağlı maraqlı bir yeniliyə addım atılıb.
Belə ki, Rusiyada süni intellekt ilə işləyən DENTOMO adlı texnologiya stomatologiya sahəsində istifadə edilmək üçün rəsmiləşdirilib. Diaqnostik dəqiqliyi 95%-ə qədər artıran DENTOMO texnologiyası süni intellektin gücünü ən ideal səviyyədə istifadə etməyi bacarırır. Qabaqcıl neyron şəbəkələri, maşın öyrənməsi və süni intellekt modellərindən istifadə edərək 15-ə qədər diş patologiyasını təyin edir.
Platformanın yaradıcıları şüa tomoqrafiyasının şərhi üçün çoxsaylı təsviri işləyərək analizlər aparıb Bu da alqoritmlərin əhəmiyyətli dərəcədə təkmilləşməsinə gətirib çıxarıb. Süni intellekt indiyədək stomotoloji sahədə müalicə üçün 5 fərqli xəstəliyi və müalicənin 10 fərqli metodla həllinin diaqnozunu dəqiqliklə ortaya qoyub. Ən böyük üstünlüyü isə hər bir xəstə üçün müalicənin fərdi şəkildə aparılmasına əhəmiyyətli dərəcədə töhfə verməsidir. Müəlliflərin fikrincə, DENTOMO gələcəkdə daha da genişləndiriləcək. Təbii ki, bura çürük, dişlərin kökləri barədə dəqiq analizdən tutmuş, implantlar, breketlərdən istifadələr və.s kimi çeşidli diaqnoz və həllər aid oluna bilər. Xüsusilə bu süni intellekt sistemləri yanlışlıqları dişlərin kökünün çıxarılması hallarının qarşısını almaqda effektiv diaqnozlar qoymağa kömək edir. Beləliklə, həkimlər yanlışlıqla problemli olmayan dişin kökünü çıxarıb pasientə mənfi hallar yaşatmamalıdır.
DENTOMO stomatologiyanın bütün sahələrində, o cümlədən üz-çənə cərrahiyyəsində analiz, planlaşdırma və yenidən formalaşdırma məqsədləri üçün istifadə edilə bilər. Nəticədə texnologiya patologiyaların müayinəsi prosesini avtomatlaşdırır və sürətləndirir, diaqnozda insan faktorunu aradan qaldırır. Süni intellekt həmçinin hər bir xəstə üçün fərdi müalicə planları yaratmaqla da önə çıxır.
