Süni intellekt məlumat mərkəzlərinin enerji ehtiyacları gün keçdikcə artmağa davam edir. Belə ki, süni intellekt sistemləri hər ötən gün təkmilləşdiyi və daha çox gücə ehtiyac duyduğu üçün süni intellekt nəhəngləri yeni yollar axtarışındadır. Oracle isə yeni süni intellekt məlumat mərkəzi üçün 3 nüvə reaktorundan istifadə etməyi planlaşdırır.
Oracle süni intellekt məlumat mərkəzlərini gücləndirmək üçün üç kiçik modul reaktor (SMR) tikmək üçün icazə alıb. Oracle rüblük gəlirlərini açıqlayan zaman bildirib ki, bu kiçik atom elektrik stansiyaları sayəsində ən azı 1 giqavat gücündə olan məlumat mərkəzi enerji ala biləcək. Habelə, bu enerji yeni süni intellekt mərkəzlərinin fəaliyyət göstərməsi üçün istifadə ediləcək. SMR-lər sualtı qayıqlar və təyyarə daşıyıcıları kimi hərbi gəmilərdə istifadə olunan reaktorlara bənzəyərək adlarına uyğun yığcam və kiçik reaktorlardır. Bununla belə, onlar hərbi gəmilərin dar məkanlarına uyğunlaşdırılmadığı üçün SMR-lər daha sərfəli şəkildə istehsal oluna bilər.
Bundan əlavə, modul dizaynı sayəsində onlar ənənəvi atom elektrik stansiyaları ilə müqayisədə daha aşağı əməliyyat xərcləri vəd edirlər. Bununla belə, Oracle-ın SMR-ləri quraşdırmağı planlaşdırdığı bölgələrdə atom elektrik stansiyaları ilə bağlı bəzi narahatlıqlar var. Çernobıl və Fukusima kimi yüksək profilli nüvə qəzaları nüvə enerjisi ilə bağlı mənfi rəyi artırıb. Buna görə də, Oracle üçün SMR-lərin quraşdırılması üçün lazımi icazələri əldə etmək çətin ola bilər. Oracle-ın təsisçisi, baş icraçı direktoru və texniki direktor Larri Ellison bildirir ki, şirkətin bütün dünyada fəaliyyət göstərən və ya tikilməkdə olan 162 bulud məlumat mərkəzi var. Bu məlumat mərkəzlərinin ən böyüyünün 800 meqavat gücə sahib olduğunu və dünyanın ən böyük süni intellekt modellərini öyrədə bilən on minlərlə Nvidia GPU-ya ev sahibliyi edəcəyini ifadə edən Ellison, Oracle-ın tezliklə 1 GW-dan böyük məlumat mərkəzlərinin tikintisinə başlayacağını bildirir.
