Beləliklə OpenAI şirkətinin süni intellekt əsaslı çatbotu ChatGPT yeni təqdim edilən GPT-4 Turbo ilə daha sürətli olacaq. Qeyd edək ki, gecə San-Francisco şəhərində süni intellekt nəhəngi OpenAI tərəfindən ilk tərtibatçı konfransı keçirilib. O cümlədən bu konfrans çərçivəsində şirkət yeni dil modelini də ictimaiyyətə təqdim edib. Yeni model sələfindən daha sürətlidir və daha uzun sorğuları cavablaya bilir. Ümumiyyətlə ChatGPT hər ötən gün təkmilləşir. Bunun əsas səbəbi isə səhvlərindən dərs çıxarmağı bacaran OpenAI şirkətidir. Daha əvvəl süni intellekt nəhəngi çatbotu üçün GPT-3, GPT-3.5 və GPT-4 dil modellərini hazırlamışdı.
İndi isə OpenAI şirkəti süni intellekt çatbotu ChatGPT üçün yeni GPT-4 Turbo dil modelini təqdim edib. Şirkətin bəyanatına görə GPT-4 Turbo 128 min hərfdən ibarət sorğunu cavablaya bilir. Maraqlısı budur ki, 128 mən hərf təxminən 300 səhifəlik mətni təşkil edir. Görünən odur ki, OpenAI bu dəfə süni intellekt çatbotunu inanılmaz səviyyədə təkmilləşdirir. Xatırladaq ki, GPT-3.5 və GPT-4 dil modelləri müvafiq olaraq 8 min və 32 min hərfdən ibarət sorğunu cavablaya bilirdi. İndi isə bu göstərici 4 dəfə artıb. OpenAI yalnız cavablandırılacaq sorğunun həcmini artırmaqla yetinməyib, yeni dil modeli ilə verilən cavabları da dəqiqləşdirib.
Habelə süni intellekt nəhənginin GPT-4 əsaslı süni intellekt çatbotu hazırda 2023-cü ilin aprel ayına qədər olan məlumatları ehtiva edən cavablarla sorğuları cavablaya bilir. Ümumiyyətlə GPT-4 Turbo özünə DALL-E 3 modelini də birləşdirir. Artıq yeni dil modeli ilə birlikdə görüntüləri birbaşa olaraq söhbət qutusuna sorğu kimi göndərmək mümkün olacaq. Süni intellekt əsaslı çatbot isə daxil edilən görüntü üçün başlıq yaratmaq və ya onun nəyə bənzədiyini təsvir edə bilmək kimi bir çox funksiyaları yerinə yetirəcək. OpenAI həmçinin bildirib ki, şirkətlər də daxil olmaqla, bütün müştərilərini məhsullarının istifadəsi səbəbindən üzləşə biləcəkləri müəllif hüquqları iddialarından qoruyacaq və onlara dəyən maddi ziyanı kompensasiya edəcək.
