Süni intellekt texnologiyaları müasir dövrdə bir çox sahədə işlərimizi asanlaşdırır və onları təkmilləşdirir. İndi isə Microsoft şirkəti süni intellekti kvant kompüterləri ilə birləşdirərək elmi tədqiqatlar sahəsində inqilabi yenilik edəcək. Belə ki, texnologiya nəhəngi bu yaxınlarda bir neçə ildir üzərində çalışdığı layihəni reallaşdıracağını açıqlayıb. Lakin hələ bu layihənin tamamlanması üçün bir neçə mərhələ mövcuddur. Texnologiya nəhənginin kvant inkişafı üzrə vitse-prezidenti Krysta Svore bildirib ki, saniyədə bir milyon əməliyyatı icra edə bilən kvant süperkompüterlərinin yaradılmasına ən azı 10 il vaxt lazimdır.
Qeyd edək ki, Microsoft şirkəti süni intellekti kvant kompüterləri ilə birləşdirmək üçün xeyli yol qətt edib. Ümumiyyətlə texnologiya nəhəngi bu layihənin reallaşması üçün böyük məbləğlərdə sərmayə qoyub. Bu isə texnolgiya nəhənginin bu layihənin reallaşdırılmasındakı marağını ortaya çıxarır. Microsoft bildirir ki, hazırda bir çox kvant maşınları mövcuddur. Lakin bu avadanlıqlar kommersiya sənayesi üçün praktiki və faydalı olacaq qədər etibarlı deyil. Hətta Svore bildirir ki, Microsoft saniyədə 1 milyon etibarlı əməliyyatı yerinə yetirə bilən və trilyonda bir xəta nisbətinə sahib olan kvant kompüteri yaratmağı planlayır.
Təbii ki, Microsoft şirkətinin tələbləri inqilabi yenilik edəcək qədər yüksəkdir. Məhz bu səbəbdən də texnologiya nəhəngi süni intellektin yardımından istifadə edəcək. Microsoft şirkəti yüksək performanslı hesablama, süni intellekt və kvant texnologiyalarını birləşdirərək elmi tədqiqatları sürətləndirəcək yeni platformasını da elan edib. Bu platforma isə Azure Quantum Elements adlanır. Hətta şirkətin baş direktoru bildirib ki, “Azure Quantum Elements ilə biz süni intellekt və kvantı bir araya gətirərək elmi kəşflərin yeni dövrünü açırıq. Məqsədimiz isə kimya və materialşünaslığın növbəti 250 ilini sadəcə 25 ilə sığışdırmaqdır”.
