Bu gün süni intellektə malik bir çox cihaz görmək mümkündür. Lakin bu dəfə eşidəcəyiniz cihaz yəqin ki, sizi təəccübləndirəcək. Çünki bu cihaz həm süni intellektə malikdir, həm də ağıllıdır. Maraqlısı budur ki, bu sadəcə bir bel çantasıdır. Bəli düz eşitdiz bel çantası, Microsoft şirkəti süni intellektə malik ağıllı bel çantası üçün patent alıb. Son aylarda Microsoft öz sərhədlərini aşır. Texnologiya nəhəngi generativ neyron şəbəkələrini bütün proqram məhsullarına inteqrasiya etməklə məşğuldur. Ümumiyyətlə Microsoft süni intellekt texnologiyasından çox ümidlidir.
Microsoft şirkət tərəfindən patenti alınan süni intellektli ağıllı bel çantası virtual köməkçi funksiyasını yerinə yetirəcək. Bu gün bel çantaları bir çox insanın həyatının bir hissəsinə çevrilib. Belə ki, bu bel çantaları həm noutbuk, həm də digər ləvazimatların rahatlıqla daşınmasında iştirak edir. Microsoft isə bu bel çantalarını sizin yaxın dostunuz edəcək. Patentə əsasən yeni ağıllı bel çantası ətraf mühiti tanımaq üçün kamera, mikrofon və sensorlara sahib olacaq. Bu məlumatlara əsasən isə rəqəmsal köməkçi istifadəçinin istəklərinə dəqiqliklə cavab verə biləcək. Yəni o, istifadəçinin gördüyü hərşeyi görəcək və onun eşitdiyi hərşeyi eşidəcək.
Maraqlısı budur ki, bu ağıllı bel çantası istifadəçilərə bələdçi də ola biləcək. Naviqasiya funksiyası ilə virtual köməkçi istifadəçiləri istənilən ünvana yönəldəcək. Belə ki, virtual köməkçi istifadəçilər ilə söhbət də edə biləcək. İstifadəçilər müxtəlif tapşırıqları həm düymə, həm də səs vasitəsi isə virtual köməkçiyə ötürə biləcək. Hələlik cihazın texniki detalları məlum deyil. Həmçinin onun nə zaman təqdim ediləcəyi də naməlumdur. Bu cihaz yalnız kağız üzərində mövcuddur. Lakin bu o demək deyil ki, gələcəkdə belə bir cihaz təqdim edilməyəcək. Sizcə belə bir cihaz hansı qiymət etiketi ilə bazara çıxar?
