Artıq süni intellekt oyunlara da əlavə ediləcək. Belə ki, dünyanın ən böyük texnologiya nəhənglərindən biri olan Microsoft oyunlara da süni intellekt gətirmək üçün hərəkətə keçib. Dinamik hekayələr, süni intellekt əsaslı NPC-lər, o cümlədən missiyalar və digər süni intellekt əsaslı yeniliklər üçün şirkət Inworld AI ilə əməkdaşlıq etməyə başlayıb. Görünən odur ki, şirkət yeni əməkdaşı ilə Xbox oyun inkişaf etdirmə alətlərini təkmilləşdirəcək.
Ümumiyyətlə yeni əməkdaşlığa əsasən Microsoft tərtibatçılara süni intellekt əsaslı personajları, hekayələr, missiyaları oyunlara əlavə etməyə imkan verəcək. Hazırda oyun sənayesi 10-15 il əvvəlkinə nəzərən dəfələrlə inkişaf edib. Təbii ki, bu inkişaf oyun sektoruna qoyulan yatırımlar və texnologiyanın inkişafı ilə bağlıdır. Təkcə Rockstar Games şirkəti 10 il əvvəl təqdim etdiyi GTA 5 oyunundan milyonlarla dollar gəlir əldə etməyi bacarmışdı. Inworld AI və Microsoft arasındaklı yeni əməkdaşlıq oyun sahəsinə olan marağı da artıracaq. Bu isə öz növbəsində oyun sektorunun inkişaf etməsinə və tərtibatçıların daha çox gəlir əldə etməsinə şərait yaradacaq.
Qeyd edək ki, texnologiya nəhəngləri oyunlara süni intellekt əsaslı proqramlarla çalışan yeni xarakterlər əlavə etməklə oyunların gözlənilməyən qərarlar və hadisələrlə oyun həvəskarlarına yeniliklər təklif etməsini planlaşdırır. Xbox şirkətində oyun süni intellekti üzrə direktor Haiyan Zhang bildirir ki,”Biz inanırıq ki, indi süni intellekt əsaslı təkmilləşmiş alətlərlə oyun tərtibatçıları inanılmaz oyunlar yarada biləcək”.
