OpenAI şirkətinin ChatGPT süni intellekt çatbotu ilə rəqabət aparan Microsoft Copilot üçün indi yeni Android proqramı təqdim edilib. Belə ki, özünəməxsus dizayna sahib olan proqram artıq əlçatandır. Ümumiyyətlə Copilot istifadəçilərin məhsuldarlığını artırmasına kömək edən və GPT-4, DALL-E 3 kimi dillər ilə təkmilləşdirilən virtual köməkçidir. Hazırda Copilot Windows 11 istifadəçiləri üçün istifadəyə verilib. Microsoft ötən aylarda təqdim etdiyi yenilənmə ilə bütün Windows 11 əməliyyat sistemindən istifadə edənlərə Copilot virtual köməkçisini əlçatan etmişdi.
Qabaqcıl süni intellekt dil modelinə sahib olan Copilot sürətli və sadə cavabları ilə istifadəçilərin istənilən probleminə həll tapa bilir. Pulsuz olaraq istifadəyə verilən süni intellekt köməkçisi sadə mətnləri vizuallaşdıra da bilir. Bing mobil proqramına olan tələbatı azaldacaq yeni Copilot android proqramı artıq Play Store mağazasında yerləşdirilib. Qeyd edək ki, hələlik virtual köməkçinin iOS sistemlərində istifadə olunması üçün nəzərdə tutulmuş versiyası mövcud deyil.
İndi ChatGPT və Copilot Play Store mağazasında rəqabətdədir. Ümumiyyətlə hər iki süni intellekt texnologiyası eyni dil modelindən istifadə etdiyi üçün struktur olaraq da eynidir. Lakin Microsoft şirkətinin Copilot proqramı Suno inteqrasiyası ilə süni intellekt əsasında musiqilər də yarada bilir. Hazırda yeni təqdim edilən android proqramı istifadəçilərin diqqətini cəlb edib. Növbəti aylarda isə onun nə qədər populyarlaşacağı məlum olacaq.
