Texnologiya dünyasının önəmli adlarından biri olan Linus Torvalds süni intellektlə bağlı fikirlərini açıqlayıb. Belə ki, Linux-un atası hesab olunan Torvalds, süni intellektin böyük hissəsinin marketinq kompaniyası olduğunu düşünür.
Vyanada keçirilən Açıq Mənbə Sammitində çıxış edən Torvalds, bu gün süni intellekt ətrafında aparılan müzakirələrin və marketinq kampaniyalarının daha çox şişirtməyə əsaslandığını düşündüyünü bildirib. Açıqsözlü olması ilə tanınan Torvalds, süni intellekt sənayesində qeyri-real gözləntilərin yaradıldığını və bu vəziyyətin sektordakı real inkişaflara kölgə saldığını düşünür. Linux-un atası süni intellekt sənayesinin hazırkı vəziyyətini “90% marketinq, 10% reallıq” kimi təsvir edib. Digər tərəfdən, Torvalds süni intellekt texnologiyasının dünyanı dəyişdirmək qabiliyyətinə malik olduğunu qəbul edir. Onun fikrincə, bu sahədə həddindən artıq şişirtmə süni intellekt sektorundakı real nailiyyətlərə kölgə salır.
Linus Torvalds, “Məncə, süni intellektin həqiqətən maraqlı olduğunu və dünyanı dəyişdirəcəyini düşünürəm. Amma bu şişirdilmiş dövran məni o qədər narahat edir ki, uzaq durmağa üstünlük verirəm”. Torvalds süni intellektin gələcəyinə nikbin yanaşaraq bildirir ki, “Beş il ərzində biz süni intellektin gündəlik işimizdə daha böyük yer tapdığını görəcəyik”. Torvalds fikirlərini müasir süni intellektin bəzi güclü tərəflərinə işarə edərək yekunlaşdırıb. O, “ChatGPT xüsusilə qrafik dizayn kimi sahələrdə təsir edici nəticələr nümayiş etdirir” deyərək bu texnologiyanın müsbət tərəflərini vurğulamağı da diqqətdən kənarda qoymayıb.
