OpenAI şirkətinin durmadan təkmilləşdirdiyi dil modeli artıq insanlarla rəqabət aparmağa başlayıb. Belə ki, GPT-4 süni intellekti, göz sağlamlığını həkimlərdən belə mükəmməl səviyyədə qiymətləndirir və onlarla rəqabət aparır. Ümumiyyətlə, süni intellekt inkişaf etməyə davam etdikcə, onun konkret sahələrdə istifadəsində də oxşar artım müşahidə olunur. ChatGPT və Gemini kimi süni intellekt alətlərini gücləndirən dil modelləri (LLM) daim təkmilləşir.
Təbii ki, dil modellərinin daim təkmilləşməsi onların tibbdə və eləcə də xüsusi tibb sahələrində istifadə olunma ehtimalını artırır. Kembric Universitetinin Kliniki Tibb Məktəbində aparılan yeni bir araşdırma da bu potensialı bir daha ortaya çıxarıb. Çünki OpenAI-nin hazırkı ən qabaqcıl modeli olan GPT 4, göz sağlamlığını qiymətləndirmədə yəni, görmə sistemi xəstəliklərinin diaqnostikası, müalicəsi və profilaktikasında həkimlərlə rəqabət aparmağa başlayıb. Belə ki, GPT-4 oftalmologiyanın qiymətləndirilməsində demək olar ki, bu sahənin mütəxəssis həkimləri qədər yaxşı performans göstərmişdir.
Araşdırmada OpenAI-nin GPT-3.5 və GPT-4 modelləri, Google-un PaLM 2 və Meta-nın LLaMA süni intellekt modelləri 87 çox seçimli sualla sınaqdan keçirilib. Bu testlərdə beş mütəxəssis oftalmoloq, 3 köməkçi oftalmoloq və iki kiçik qeyri-mütəxəssis həkim də iştirak etmişdir. Qeyd edək ki, İnsanlara və süni intellekt modellərinə verilən suallar işığa həssaslıqdan tutmuş lezyonlara qədər həkimləri sınaqdan keçirmək üçün hazırlanmış dərslikdən götürülüb. Bu kitabın məzmunu ictimaiyyətə açıq olmadığından, tədqiqatçılar süni intellekt modellərinin bu suallar üçün hazırlanmadığına inanırlar. Lakin buna baxmayaraq, GPT-4 87 sualdan 60-na düzgün cavab verərək təcrübəçi həkimlərdən və hətta köməkçi həkimlərdən belə daha yüksək bal alıb. Bu arada testlərdə PaLM 2 49 bal, GPT-3.5 isə 42 bal toplayıb. LLaMa ən aşağı nəticəni 28 balla alıb.
