Google şirkətinin süni intellekt əsaslı söhbət vasitəsi olan Bard bu gün adını Gemini yəni “Əkizlər” olaraq dəyişib. Ümumiyyətlə bu dəyişiklik heç də təəccüblü deyildi, çünki, Google şirkəti bir müddətdir ki, yeni nəsil LLD üçün Gemini adından aktiv olaraq istifadə edirdi. Bundan əlavə, Bard adı istifadəçilər arasında ümumiyyətlə qəbul edilmədiyi üçün Google şirkətinin belə bir addım atması heç də məntiqsiz deyil.
Google bir müddət əvvəl keçirdiyi mətbuat konfransı çərçivəsində süni intellektə yönəlmiş bəzi yeniləmələri açıqladı. Bunlardan ən diqqət çəkəni ad dəyişikliyidir. Ötən ildən bəri həyatımızda olan ChatGPT rəqibi Google Bard indi Gemini adlanacaq. Qeyd edək ki, süni intellektin əsas versiyası hələ də pulsuz olaraq qalacaq. Ümumiyyətlə Gemini süni intellekt modeli Google tərəfindən ötən aylarda təqdim edilmişdi. İndi isə dəyişikliklər təkcə ad dəyişikliyi ilə məhdudlaşmır. Gemini Advanced artıq Google One Get Premium planına daxildir. Habelə, Android üçün ayrıca Gemini proqramı da olacaq. iOS istifadəçiləri isə Gemini-yə Google tətbiqi vasitəsi ilə daxil ola biləcəklər.
Google, Gemini süni intellektini təqdim edərkən onun ən təkmil versiyası olan Ultra modelinin daha sonra buraxılacağını bildirmişdi. . İndi bu Ultra versiyası Gemini Advanced adı altında buraxılıb. Gemini Advanced, mülahizə yürütmək, təlimatlara əməl etmək, kodlaşdırma və yaradıcı əməkdaşlıq etmək üçün daha bacarıqlı yeni təcrübə təqdim edəcək. Gemini Ultra-nın həm dünya biliyini, həm də problemi həll etmək üçün riyaziyyat, fizika, tarix, hüquq, tibb kimi 57 fənnin birləşməsindən istifadə edən MMLU (massive multitasking language understanding) sahəsində mütəxəssisləri üstələyən ilk model olduğunu vurğulamaq lazımdır.
Onu da qeyd edək ki, Gemini modelləri, Workspace və Google Cloud kimi insanların və müəssisələrin hər gün istifadə etdiyi məhsullara da gəlir. Artıq 1 milyondan çox insan Duet AI vasitəsilə məhsuldarlığını və yaradıcılığını artırmaq üçün Yazmağa kömək et kimi funksiyalardan istifadə edir. Habelə, Cloud müştəriləri üçün Duet AI də yaxın həftələrdə Gemini-yə çevriləcək.
