Süni intellekt texnologiyaları inkiaş etsə də, onların təhlükəsizliyi hələ də sual altındadır. Məhz bu səbəbdən də bir çox texnologiya nəhəngi ChatGPT kimi süni intellekt alətlərində istifadə etmir. Hətta onlar özlərinin süni intellekt çatbotunu yaradırlar. Texnologiya şirkətləri şübhə etməkdə haqlıdırlar çünki, ChatGPT istifadəçilərinin şəxsi məlumatları oğurlanaraq “qara bazarda” satışa çıxarılıb. Belə ki, beynəlxalq kibertəhlükəsizlik şirkəti Group-IB öz hesabatında 100 mindən çox çatbot istifadəçisinin məlumatlarının internetə sızdırıldığını və darknet bənzəri qara bazarlarda satışa çıxarıldığını bildirib. Hətta bu sızıntılar 2022-ci il iyun ayı ilə bu ilin may ayı arasında həyata keçirilib.
Maraqlısı budur ki, Asiya və Sakit okean ətrafı region sızdırılmış məlumatları ən çox təklif edən regiondur. Hətta bu regionda daha çox məlumat sızdırılıb. ChatGPT istifadəçilərinin məlumatları müxtəlif ölkələrdə fərqli səviyyədə sızdırılıb. Hindistanda 12362 məlumat, Pakistanda 9217 məlumat, Braziliyada 6531 məlumat sızdırılıb. Digər ölkələrə isə Vyetnam, Misir, ABŞ, Fransa, Mərakeş, İndoneziya və Banqladeş aiddir. Group-IB bildirir ki, oğurlanmış məlumatlar qara bazarda çox sürətlə satılır. Yəni insanlar oğurlanmış məlumatları əldə etmək üçün çox maraq göstərir. Bu isə gələcəkdə bir çox problemin ortaya çıxmasına səbəb ola bilər.
Oğurlanmış məlumatlar əsasən kompüterlərə yüklənən zərərli viruslar vasitəsi ilə ələ keçirilib. Qeyd edək ki, əksər məlumat Raccon adlı zərərli proqram ilə, daha sonra isə Windows-un cəsus proqramı olan Vidar vasitəsi ilə və son olaraq RedLine Trojan vasitəsi ilə ələ keçirilib. Ən pisi budur ki, sızdırılan məlumatlar sadəcə şəxsi olmaqla qalmayıb şirkət sirləri də ola bilir. Yəni şirkət işçilərinin süni intellekt çatbotunda axtardıqları bütün ticarət sirləri və ya kommersiya sirləri artıq satışa çıxarılıb.
