OpenAI yeni sabit telefon funksiyasını elan edib. Belə ki, şirkət ChatGPT-ni stasionar telefonlara inteqrasiya etməklə istifadəçilərə telefon vasitəsilə süni intellektə zəng etmək imkanı təklif edir.
Beləliklə, OpenAI yeni bir addım ataraq stasionar teelefon xəttinə inteqrasiya etdiyini açıqlayıb. 1-800-CHATGPT nömrəsinə zəng edən istifadəçilər bu gündən etibarən süni intellekt dəstəkli köməkçi ilə əlaqə saxlaya biləcəklər. OpenAI, ChatGPT-ni telefonlara gətirən bu addım ilə süni intellekt texnologiyasını daha çox insana çatdırmağı hədəfləyir. İstifadəçilər telefon vasitəsilə ChatGPT-yə zəng edərək ona müxtəlif suallar verə və cavab ala, hətta cümlələri müxtəlif dillərə tərcümə edə biləcəklər.
Qeyd edək ki, OpenAI ilk dəfə ABŞ istifadəçiləri üçün 15 dəqiqəlik pulsuz danışıq vaxtı ilə bu xidməti təklif edir. Zənglər üçün standart operator tarifləri tətbiq oluna bilər. Bu yeni funksiyanın tədricən müxtəlif ölkələrə yayılması gözlənilir. Digər tərəfdən, ChatGPT WhatsApp vasitəsilə də əlçatan olub. WhatsApp-da isə şəxsi fərdiləşdirmə variantları mövcud deyil. Bununla belə, istifadəçilər gündəlik istifadə limitinə çatdıqda, onlar ChatGPT tətbiqini yükləyə və masaüstü versiyasından istifadə edərək söhbətə davam edə biləcəklər. OpenAI, WhatsApp inteqrasiyası üçün yeni funksiyalar üzərində işlədiyini açıqlasa da, u funksiyaların nə vaxt istifadəyə veriləcəyi məlum deyil.
