Bu gün bir çox smartfon istehsalçısı əməliyyat sistemlərində süni intellekt dil modellərindən istifadə edir. Lakin amerikalı texnologiya nəhəngi Apple hələ də süni intellekt texnologiyalarını öz modellərinə tətbiq etməmişdi. Nəhayət bu gün məlum olub ki, Apple gələn il təqdim edəcəyi iOS 18 sistemində süni intellekt dil modellərindən istifadə edəcək. Hətta Apple Siri virtual köməkçisini daha ağıllı edəcək.
Yeni iPhone 15 seriyasının və iOS 17 əməliyyat sisteminin təqdim edilməsinə günlər qala Apple şirkətinin gələn il təqdim edəcəyi iOS 18 ilə bağlı maraqlı məlumatlar ortaya çıxıb. Ümumiyyətlə hər il Apple brendi yeni flaqman modellərini təqdim edənə yaxın gələn il təqdim ediləcək cihazları və ya əməliyyat sistemi ilə bağlı məlumatlar ortaya çıxır. Bu dəfə də məlum olub ki, Apple iOS 18 əməliyyat sistemində Siri süni intellekt dil modellərindən istifadə edərək daha ağıllı olacaq. The Information mənbəsinə görə şirkət əməliyyat sisteminin müxtəlif aspektlərinə inteqrasiya olunacaq yeni süni intellekt texnologiyaları hazırlayır.
Xatırladaq ki, daha əvvəl Apple brendinin yeni süni intellekt çatbotu hazırladığı ortaya çıxmışdı. Hətta müxtəlif mənbələrə görə texnologiya nəhəngi hər gün milyonlarla dolları məhz süni intellekt modelləri üçün sərf edir. Bu isə onu göstərir ki, Apple iPhone 16 seriyası ilə birlikdə süni intellekt əsaslı funksiyalar da təqdim edəcək. Həmçinin texnologiya nəhəngi iOS 18 əməliyyat sistemində süni intellekt texnologiyalarına üstünlük verəcək.
