Cənubi Koreya mərkəzli Samsung nəhayət Galaxy Ring ağıllı üzüyünü rəsmi olaraq təqdim edib. Belə ki, Barselona şəhərində baş tutan MWC 2024 sərgisi çərçivəsində texnologiya nəhəngi uzun müddətdir təqdim etməyi hazırlaşdığı Galaxy Ring modelini gün üzünə çıxarıb. Dizaynı ilk dəfə real olaraq qarşımıza çıxan ağıllı üzük Samsunga görə “uzun batareya ömrü”-nə sahibdir.
Beləliklə Samsung brenidi geyilə bilən cihazlar seriyasına yeni Galaxy Ring ağıllı üzüyünü rəsmi olaraq əlavə edib. Yanvar ayında Galaxy S24 seriyası təqdim edilərkən sadəcə tizeri nümayiş edilən cihaz nəhayət Barselona şəhərində real olaraq vitrinə qoyulub. Lakin ağıllı üzüyü sadəcə uzaqdan görüntüləmək mümkün olub, texnologiya həvəskarları ağıllı üzüyü sınamaq və ya ona taxınmaq imkanı əldə etməyib. Qeyd edək ki, yeni ağıllı üzük titan çərçivəyə sahib olduğu üçün olduqca yüngüldür.
Samsung yeni ağıllı üzüyünü 3 rəngdə gümüşü, qara və qızılı olmaqla təklif edəcək. Şirkət bildirir ki, üzük şəhadət barmağı üçün əlverişlidir, çünku sensorlar bu barmaqda ən yaxşı göstəriciləri təqdim edir. O cümlədən, üzüyün daxili hissəsində S və ya XL kimi hərflərlə işarələnmiş 5-dən 13-ə qədər müxtəlif barmaq ölçüləri mövcuddur. Maraqlısı isə budur ki, cihazın işləmə müddəti və ya batareya həcmi də məhz onun barmaq ölçüsündən asılı olaraq dəyişəcək. Hazırda ağıllı üzüyün batareya həcmi 14.5 ilə 21.5 mAs arasında dəyişir. Lakin onun nə qədər istifadə müddəti təklif etdiyi hələlik sual atındadır.
Ağıllı üzüyün ən qabaqcıl xüsusiyyətlərindən biri yuxu izləmədir. Samsung Digital Health-in prezidenti Hok Pak bildirir ki, bir çox insan yatarkən ağıllı saatdan istifadə etmir. Bu isə nəticədə onların yuxu məlumatlarını izləməyə imkan vermir. Lakin kiçik həcmə və çox yüngül çəkiyə sahib olan ağıllı üzük ilə artıq istifadəçilər yatarkən də rahatlıqla yuxu məlumatlarını izləyə biləcəklər. CNET-in məlumatına görə, cihaz ürək döyüntüsünü, tənəffüs sürətini, gecə hərəkətlərini və yuxu gecikməsini qeyd edə biləcək. Cihazın satışa çıxarılma tarixi ilə bağlı məlumat olmasa da, onun ən tez müddətdə satışa çıxacağı güman edilir.
