WhatsApp mesajlaşma tətbiqi bazarda rəqabət artdıqca öz yerini möhkəmləndirməyə çalışır. Məhz bu səbəbdən demək olar hər həftə tətbiqlə bağlı müxtəlif maraqlı yeniliklər ortaya çıxır. İndi isə yaxınlaşmaqda olan WhatsApp premium xüsusiyyəti barədə WABetaInfo resursu bəzi yeni məlumatlar paylaşıb. Premium abunəlikdən yararlanaraq bir WhatsApp hesabına 10 ədədə qədər cihazla bağlana biləcəksiniz.
WhatsApp Premium nədir və necə istifadə olunacaq?
Mesajlaşma tətbiqinin bu abunəlik özəlliyi əslində sadə istifadəçilər üçün nəzərdə tutulmayıb. Müəyyən bir ödəniş ödəyərək abunəlik alan şəxslər WhatsApp tətbiqinin Biznes versiyasını istifadə etməlidirlər. Çünki, abunəlik sizlər üçün çox saylı cihaz dəstəyi gətirəcək. Bir hesaba eyni anda 10 nəfərin qoşulması mümkün olacaq. Abunəlik xüsusiyyətinin gətirdiyi yeniliklər isə təbii ki, bununla bitmir.
Verilən digər bir məlumata görə, WhatsApp Premium abunəliyiniə sahib hesablarınızda özəlləşdirilmiş linklər yarada biləcəksiniz. Məlumatı olmayanlar üçün qeyd edək ki, hesab linkləri profilinizi paylaşmaq üçün istifadə olunur. “İndiyə qədər belə bir şey yox idi?” sualını bəziləriniz verə bilər. Lakin abunəliyə əlavə edilən link yaratma özəlliyi biraz fərqli işləyəcək. Müəssisələr artıq öz biznes hesablarının linklərini istənilən formda adlandıracaqlar. Məsələn, öz biznes hesabınızında wa.me/ hissəsinin qarşısına almaarmud123 yazmaqla göndərilən linkin məhz bu cür görünməsini təmin edə biləcəksiniz.
Bir çox insana belə bir yenilik bəlkə də mənasız görünür. Lakin linkdəki adın yadda qalan olması başda şirkətlər və hüquqi şəxslər üçün vacib amildir. Təsəvvür edin həkiminiz tanınmış bir şəxsdir və biznes hesabı var. Nömrəsini xatırlamırsınız. İnternetə daxil olub wa.me/filankəsfilankəsov yazmaqla həkiminizin nömrəsini əldə edirsiniz. Yaxşı xüsusiyyətdir, elə deyilmi?
Sızdırılan məlumatlar hələlik bu qədərdir. WhatsApp Premium abunəliyinin hansı qiymətdən başlayacağı məlum deyil. Yenilik indi test mərhələsindədir və Android versiyasının beta variantında ortaya çıxıb. Əlavə olaraq sadə WhatsApp tətbiqi üçün də müxtəlif yeniliklərin test edildiyi bildirilir. Həmin yeniliklərdən bəzilərini aşağıda qeyd edirik:
- MacOS üçün özəl WhatsApp proqramı hazırlanılır.
- Hansısa qrupdan çıxarkən bildiriş sadəcə idarəçiyə gedəcək.
- WhatsApp qruplarının filterlənməsi mümkün olacaq.
- WhatsApp Web üzərindən qruplardakı mesajı etiketləyərək cavablamaq üçün kənara düymə əlavə ediləcək.
- Statusunuza yerləşdirdiyiniz linklərin görüntüsü təkmilləşdiriləcək.
