Elmi filmlərdə gələcəklə bağlı texnologiyaların həyatla necə iç-içə və realistik təsvir edildiyini bəlkə də görmüsünüz. Sanki monitorda baxdığınız cisim o qədər canlı görünür ki, əlinizi uzadıb ona toxunmaq istəyirsiniz. Təsəvvür etməsi belə görmədən çətin olan bu tip ideyaları həqiqətən həyata keçirmək istəyənlər mövcuddur. Hətta bunu tanınmış avtomobil istehsalçısının öz multimedia sistemi üçün tətbiq etmək istədiyini gördükdə təəccüblənməyiniz də mümkündür. Volvo Cars tərəfindən verilən məlumata görə şirkət Unreal Engine 5 ilə fotorealistik multimedia və proqram təminatı hazırlamaqla bağlı böyük bir əməkdaşlığa başlayır.
Volvo-nun Fotorealistik multimedia hazırlamaqda məqsədi nədir?
Elektromobillər bazara çıxdıqca, başda Tesla şirkətinin gətirmiş olduğu dəblə birlikdə standart avtomobil anlayışı yeriyən texnoloji cihaza doğru təkmilləşməyə başladı. Volvo Cars da bu dəblə ayaqlaşmaqla qalmayıb alıcılarına indiyə qədər görə biləcəyi ən yaxşı multimedia sistemini təqdim etmək üçün işə başlayıb. Yəqin ki, əksəriyyətiniz Epic Games şirkətini tanıyırsınız. Volvo Cars məhz Epic Games ilə əməkdaşlıq edərək fotorealistik və təkmilləşdirilmiş 3D görüntüləmə imkanı gətirəcək. Şirkət bu vaxta qədər multimedia sisteminin proqram təminatında Android əməliyyat sistemindən istifadə edirdisə, Epic Games ilə birlikdə yaradılacaq yeni qrafiklər Unreal Engine 5 oyun motoru ilə hazırlanacaq. Unreal Engine 5 isə bildiyimiz oyunlarda insanı valeh edən fantastik qrafiklər ortaya qoyur. Volvo şirkətinin məqsədi isə həmin fantastik qrafikləri, fotorealistik görüntüyə çevirərək avtomobilin multimediasına istifadə etməkdir.
Bütün bu yeniliklər isə “Human Machine Interface-HMI” sisteminin, sadə dildə desək HMI interfeysinin inkişafına öz təsirini göstərəcək. Əslində HMI bir interfeysdən daha çox, avadanlıqla insanın sıx əlaqədə olduğu sistemlərə deyilir. Volvo Cars isə HMI sistemi üçün avtomobillərdə Unreal Engine motorunu tətbiq edən ilk avropa brendi olacaq. Bunların hamısı, fotorealistik multimedia daxil olmaqla üçüncü nəsil “Snapdragon® Cockpit” platformasının üzərinə inşa ediləcək. Yəni Qualcomm texnologiyalarına da Volvo Cars yer verəcək.
Yeni nəsil texnologiyaların hamısını özündə birləşdirən ilk avtomobil bu ilin sonunda təqdim ediləcək. Nümayiş etdiriləcək avtomobil, şirkətin yeni nəsil flaqman elektromobili kimi nəzərdə tutulacaq deyə qeyd edilir. Şirkət 2030-cu ildən tamamilə elektromobil istehsalına keçməyi planlaşdırır.
