Microsoft şirkəti Windows 11 əməliyyat sisteminə süni intellekt əsaslı Copilot virtual köməkçisini inteqrasiya edəcək. Belə ki, Build 2023 konfransı çərçivəsində Microsoft şirkəti daha əvvəl GitHub servisi və Microsoft 365 ofis tətbiqləri üçün istifadəyə verilən virtual köməkçinin Windows əməliyyat sisteminə inteqrasiya ediləcəyini bildirib. Yeni virtual köməkçi tətbiqlər və fayllar ilə birgə fəaliyyət göstərə biləcək və əməliyyat sistemini idarə edəcək. Qeyd edək ki, yeni Copilot köməkçisini axtarış çubuğu vasitəsi ilə aktiv etmək mümkün olacaq. Ümumiyyətlə yeni virtual köməkçi bizlərə Cortana-nı xatırladır.
Microsoft şirkətinin Windows və cihazlar üzrə rəhbəri Panos Panay bildirir ki, Windows Copilot sizin proqramlarınız və pəncərələriniz ilə yanaşı işləyir, sizə yardım edir. Belə ki, Copilot köməkçisi tətbiqlərdəki məlumatların məzmununu ümumiləşdirə, yenidən yaza və təsvir edə bilər. Ümumiyyətlə yeni virtual köməkçinin interfeysi Bing söhbət proqramının interfeysinə bənzəyir. Lakin Copilot Taskbar bölməsində axtarış sahəsinin yanında yerləşəcək. Aktivləşdirilən zaman Copilot ekranın sağ hissəsində dialoq pəncərəsi formasında açılacaq.
Qeyd edək ki, Windows 11 əməliyyat sistemindəki Copilot virtual köməkçisinə istifadəçilər istənilən sualı verə biləcək. Süni intellekt əsaslı virtual köməkçi ChatGPT çatbotunu da əvəzləyəcək. Microsoft həmçinin elan edib ki, yeni virtual köməkçini Windows Terminal-a da inteqrasiya edib. Windows Terminal daxilində çat-bot GitHub-dakı analoqu kimi çalışacaq. Belə ki, o, istifadəçiyə Terminal ilə bağlı lazımi əmrləri təqdim edəcək, səhvləri aşkar edəcək və Terminal daxilində müəyyən əməliyyatları yerinə yetirəcək.
