Axtarışlarımızı həyata keçirərkən müxtəlif brauzerlərdən istifadə edirik. Rəqəmlər istifadəçilərin böyük bir qisminin Google Chrome brauzerindən istifadə etdiyini göstərsə də istifadəçilərin müəyyən qismi Microsoft Edge, Mozilla Firefox, Opera kimi brauzerlərdən istifadə edərək axtarışlarını həyata keçirir. Hazırda sözü gedən Apple-ın Safari brauzeri də axtrarışlar zamanı ən çox işə yarayan brauzerlər sırasındadır. Bu da Safarinin Google Chrome-dan sonra 1 milyard aktiv istifadəçi sayını keçən ikinci brauzer olmasına imkan verdi. Keçən həftələrdə sıralamanın üçüncü yerində olsa da artıq ikinci pilləyə qalxmağı bacardı.
Safari brauzerinin rəqibi Chrome hələdə liderliyini qoruyur
Verilən yeni məlumatlar hazırda bütün internet istifadəçilərinin təxminən 19 faizinin Apple-ın brauzerindən istifadə etdiyini göstərsə də, Google Chrome təxminən 3,4 milyard istifadəçi ilə açıq şəkildə lider olmağa davam edir. Bundan başqa Safari mobil və desktop brauzerlər arasında irəliləyiş əldə etsə belə, sadəcə desktop brauzerlər nəzərə alındıqda Microsoft Edge hələ də ikinci pillədə dayanır. Desktop versiyasında Google Chrome 66,1% istifadəçi sayı ilə liderliyini qoruyub saxlayır. İkinci yerdə 10,11% istifadəçi ilə Microsoft Edge gəlir. Safari isə 9,16% istifadəçi ilə üçüncüdür. Sıralamanın davamına baxdıqda isə 7.66% ilə Mozilla Firefox görünür. Opera isə istifadəçilərin 2.81%-inə sahibdir.
Qeyd edək ki, Safari Apple tərəfindən hazırlanmış və WebKit-ə əsaslanan veb brauzerdir. İlk dəfə 2003-cü ildə Mac OS X Panther ilə buraxıldı və iPhone-un 2007-ci ildə satışa çıxması ilə iOS cihazlarına daxil edildi. Bu brauzer Apple tərəfindən hazırlanmış bütün cihazların standart brauzeridir. Mobil versiyaya nəzər saldıqda Safari-nin iOS və xüsusilə iPhone telefonlarından edilən yükləmələr nəticəsində bir milyard istifadəçiyə çatdığı açıqlandı. Qeyd edək ki, keçən yanvar ayında Apple şirkəti iOS və macOS sistemlərində 1,8 milyard cihazdan ibarət istifadəçi bazasına sahib olduğunu elan etmişdi.
Ən çox istifadəçisi olan mobil brauzerlər:
- Google Chrome – 64,83%
- Safari – 24,77%
- Samsung İnternet – 4.84%
- Opera – 1,72%
- UC Browser – 1,25%
Ən çox istifadəçisi olan desktop brauzerlər:
- Google Chrome – 66,1%
- Microsoft Edge – 10.11%
- Safari – 9,16%
- Mozilla Firefox – 7.66%
- Opera – 2.81%
