Microsoft şirkətinin illərdir məşhur olan Windows əməliyyat sisteminə indi yeni bir rəqib gəlir. Belə ki, Honq-Konq mərkəzli Lenovo şirkəti süni intellekt əsaslı yeni əməliyyat sistemi üzərində işləyir. Ümumiyyətlə bu gün demək olar ki, hər bir məhsulun əvəzedicisi mövcuddur, lakin bəzi məhsullar mövcuddur ki, onların illərdir rəqibi və ya əvəzedicisi ortaya çıxa bilməyib. Bunlardan biri də məhz Windows sistemidir. Windows illərdir o qədər məşhurlaşıb ki, istifadəçilər heç bir alternativ fikirləşmədən ondan istifadə edir.
Bununla belə, Lenovo şirkəti Windows rəqibi olacaq yeni süni intellekt əsaslı əməliyyat sistemi hazırlayır. Maraqlısı budur ki, biz Lenovo-dan proqram təminatı sahəsində bir şey görməmişik. Lakin tezliklə Lenovo da proqram təminatı tərəfində yeniliklər etməyə başlayacaq. CES 2024 tədbirində Lenovo-nun əsas nümayəndəsi Liu Jun bu il süni intellekt əsaslı əməliyyat sistemini təqdim etmək planlarını açıqlamışdı.
Lenovo-nun öz əməliyyat sistemini inkişaf etdirmək qərarı, görünür, şirkətin süni intellektə doğru ümumi keçidinin bir hissəsidir. Bütövlükdə texnologiya bazarına nəzər saldıqda görünür ki, süni intellekt texnologiya sahəsinin demək olar ki, hər tərəfinə nüfuz etmiş və ondan məhsullarında istifadə edə bilən bütün texnologiya şirkətləri tərəfindən mənimsənilmişdir. Lenovo şirkəti də artıq öz cihazlarında təbii dildən istifadə edərək nə istədiyimizi başa düşəcək süni intellekt əsaslı əməliyyat sistemi istifadə edəcək. Şirkət 2024-cü ilin birinci yarısında satışa çıxması planlaşdırılan süni intellektli kompüterlərini təqdim etməyə hazırlaşır.
