Google şirkətinin Chrome brauzeri hazırda milyonlarla istifadəçi tərəfindən işlədilir. Maraqlısı budur ki, demək olar ki, bütün istifadəçilər brauzerin həddindən artıq yaddaş istifadə etməsindən şikayətlənir. Hətta bəzən bu göstərici cihazın yaddaşının yarısını belə əhatə edir. Məhz bu səbəbdən bir çox istifadəçi alternativ brauzerlərdən istifadə edir. İndi isə Google Chrome brauzeri açılan pəncərələrin nə qədər yaddaş istifadə etdiyini göstərir. Yəni, artıq brazuerinizdə hansı pəncərənin çox ram istifadə etdiyini müşahidə edə biləcəksiniz.
Dünyanın ən çox istifadə olunan brauzeri olan Chrome yeni funksiyanı hələlik sınaqdan keçirir. Yəni sadəcə müəyyən istifadəçilər Chrome brauzerində açdığı pəncərələrin nə qədər yaddaş istifadə etdiyini görə bilir. Bu funksiyadan istifadə edə bilmək üçün istifadəçilər siçanı yalnız açılmış pəncərənin üzərinə hərəkət etdirməlidir. Bir saniyə gözlədikdən sonra Chrome brauzeri açılan pəncərənin nə qədər ram yəni, operativ yaddaş istifadə etdiyini bildirir. Onu da qeyd edək ki, yeni funksiya Chrome 118 ilə bizlərə təklif olunacaq.
Ümumiyyətlə Chrome brauzerinin nə qədər yaddaş istifadə etməyini öyrənmək üçün istifadəçilər Task Manager proqramına daxil olurdular. Habelə burada brauzerin ümumilikdə istifadə etdiyi yaddaş miqdarı göstərilirdi. İndi isə yenilənmə ilə birlikdə həm əlavə proqramlara ehtiyac qalmayacaq, həm də ayrılıqda Chrome pəncərələrinin nə qədər yaddaş istifadə etdiyini görmək mümkün olacaq.
