“Apple”ın bu gün keçiriləcək olan Ümumdünya Tərtibatçılar Konfransında (WWDC 2025) iOS və macOS da daxil olmaqla bütün platformaları üçün böyük bir vizual yenilik təqdim edəcəyi gözlənilir. Etibarlı mənbələrə görə, şirkət iPhone-un 20-ci ildönümünə hazırlıq məqsədilə “Maye Şüşə” (Liquid Glass) adlandırılan yeni bir dizayn dilini təqdim edəcək.
Bloomberg-in tanınmış texnologiya jurnalisti Mark Qurmanın hesabatına görə, bu axşam baş tutacaq təqdimatda elan ediləcək yeni iOS 26 əməliyyat sistemi tamamilə fərqli bir görünüşə sahib olacaq. Bu dizayn təkcə iPhone üçün deyil, eyni zamanda macOS, iPadOS, watchOS və hətta tvOS üçün də tətbiq ediləcək. Yeni interfeysin əsas xüsusiyyətlərinin “şəffaflıq və parlaqlıq effektləri” olacağı, düymələrin, alətlər panelinin və digər idarəetmə elementlərinin cilalanmış şüşəyə bənzəyəcəyi bildirilir.
Bu, “Apple” üçün son on ildəki ən böyük sistem səviyyəli vizual dəyişiklik olacaq. Şirkət son dəfə 2013-cü ildə iOS 7 ilə belə köklü bir dəyişiklik edərək, obyektlərin real dünyadakı analoqlarını təqlid etdiyi “skeuomorfizm” dizaynından daha müasir və sadə görünüşə keçid etmişdi. Qurmanın təsvirinə görə, yeni dizayn “şüşə səthinin parıltısı və şəffaf görselləri” ilə daha zərif bir hissiyyat yaradacaq.
Mark Qurmana görə, bu dizayn dəyişikliyi sadəcə vizual yenilik deyil, həm də strateji bir addımdır. O, bu addımın “iPhone-un 20-ci ildönümünə həsr olunmuş və tamamilə şüşə dizaynına fokuslanmış model üçün zəmin hazırladığını” bildirib. 2027-ci ildə təqdim ediləcəyi gözlənilən iPhone modellərinin əyri şüşə kənarlara, ultra nazik çərçivələrə və kəsiksiz ekrana sahib olacağı şayiələri var ki, bu da “Maye Şüşə” interfeysi ilə mükəmməl bir uyğunluq təşkil edərdi.
Bu vizual birlik təkcə iPhone ilə məhdudlaşmayacaq. Əsas ideya, “Apple”ın bütün ekosistemini – iPhone-dan Mac-ə və Vision Pro-ya qədər – vizual olaraq vahid bir üsluba gətirməkdir. Bu, istifadəçilərin bir cihazdan digərinə keçərkən hiss etdikləri vizual fərqliliyi minimuma endirməyə kömək edəcək.
Maraqlıdır ki, Qurman yeni interfeys dizaynının WWDC 2025-in əsas diqqət mərkəzində olacağını, lakin süni intellekt mövzusunda “Apple”ın rəqiblərindən geri qalmağa davam edəcəyini də qeyd edir. “Apple”ın WWDC 2025 təqdimatı bu axşam, Bakı vaxtı ilə saat 21:00-da başlayacaq. Kaliforniyadakı Apple Park-da keçiriləcək tədbirdə şirkət, iOS 26 da daxil olmaqla yeni əməliyyat sistemlərini nümayiş etdirəcək.
