Ötən həftə qlobal bazara bütün smartfonları ilə rəsmi olaraq daxil olan Honor brendi, yeni orta seqment cihaz hazırlayır. Belə ki, Honor Magic 4 seriyasından tutmuş, Honor Magic V modelinə qədər bütün smartfonlar IFA 2022 sərgisi timsalında nümayiş etdirildi. Eyni vaxtda da ölkəmizdə Honor 70 modelinin təqdimatı keçirilirdi. Beləliklə, qlobal bazara tamamilə ayaq açmış hesab edilən şirkət 15 sentyabrda özünün yeni premium görünüşlü orta seqment smartfonunu təqdim edəcək. Söhbət, Honor X30 modelinin davamı olan Honor X40 modelindən gedir. Qlobal bazarda Honor X30 modeli Honor X8 adlandırıldığı üçün, Honor X40 modeli böyük bir ehtimalla Honor X10 kimi təkrar brendləşdiriləcək.
Premium görünüşlü Honor X40 hansı xüsusiyyətlərə malik olacaq?
Bəzilərinə eybəcər, bəzilərinə normal görünən Honor X40 modelinə öndən baxdıqda tamamilə üst seqment cihazları xatırladacaq. Bunun səbəbi isə 6.67 düymlük FHD+ təsvir ölçülü yanlardan qıvrımlı 120Hz OLED ekran panelinin cihaza quraşdırılmasıdır. Üstəlik bu ekran yüksək tezlikli PWM göz qoruması standartına da malikdir. Görünüşü üst seqment cihazlara bənzəsə də orta seqment üçün nəzərdə tutulmuş Snapdragon 695 5G çipseti ilə təchiz edilib.
Honor brendinin bu yanaşması isə “Nəyə görə büdcəvi smartfonlar da premium cihazlara bənzəməsin?” prinsipi ilə ortaya çıxır. İlk dəfə Honor 50 modeli ilə Snapdragon 778G çipsetinə sahib premium görünüşlü orta-üst seqment cihazını təqdim edən şirkət, indi də orta seqmentə bu prinsipini tətbiq edir.
Yeni Honor X40 modelinin digər vacib xüsusiyyətləri də bu gün sızdırılıb. Belə ki, smartfon 50MP əsas, 2MP naməlum sensordan ibarət arxa kameralara sahibdir. Ön tərəfdə isə 8MP selfi kamerası quraşdırılıb. Kameraları da yetəri qədər güclü olmayan smartfon nəticə etibarilə, minimum qiymətə yüksək keyfiyyətli ekran, ortalama performans ilə stabil işləmə bacarığı və ideal dizayn axtaranların seçimi olacaq.
Qeyd edək ki, 5100 mAs batareyası 40 Vt sürətli şarj dəstəkləyəcək. Üstəlik 172 qram çəkisi ilə digər smartfonlardan müəyyən qədər yüngül olacaq. Smartfonun rəsmi təqdimat tədbiri, ilk abzasda da qeyd etdiyimiz kimi 15 sentyabr tarixinə planlaşdırılıb.
