Bəzən şəxsi məlumatlarımızın, hesablarımızın qorunması üçün təyin etdiyimiz parollar heç də məlumatlarımızı və hesablarımızı təhlükəsiz etmir. NordPass adlı şirkət iddia edir ki, 2022-ci ildə istifadə olunan populyar parollar sadəcə 1 saniyəyə belə sındırıla bilər. NordPass Dünya Parol günü münasibəti ilə ötən il ABŞ və digər 29 ölkədə ən çox istifadə olunan parolları sadalayıb. Tədqiqatçılar ən populyar parolları təyin etmək üçün 3TB-dan çox məlumatı emal etməli olublar. Nəticədə isə onlar 200 ədəd ən populyar parolu təyin edib.
Hesabatda qeyd edilib ki, ən populyar parollar siyahısında 83% parol 1 saniyədən az müddətdə belə sındırıla bilər. Buna səbəb isə insanların öz vərdişlərindən imtina etməyərək sadə parollardan istifadə etməsidir. Bəzən parolları unutmamaq üçün insanlar çox sadə parollardan istifadə edir. Lakin bu onların şəxsi məlumatlarını təhlükə altında qoyur. Dünyada ən çox istifadə olunan ilk 3 parol məhz “password”, “123456” və “123456789” parollarıdır. Bu parollar isə həvəskar hakerlər tərəfindən belə sındırıla bilər.
Ümumiyyətlə müasir dövrdə kiberhücumların sayı çoxalmışdır. Artıq hakerlər müəyyən kombinasiyada parolları çox qısa müddətdə sındıra bilir. Bir çox texnoloji şirkət populyar parollar üçün yeni bir həll üsulu düşünür. Məsələn OPPO şirkəti parollardan istifadəni azaltmağa hətta ləğv etməyə çalışır. Belə ki, şirkət FIDO adlı yeni ittifaqa qoşulduğunu elan edib. Bu ittifaq parolların intensiv istifadəsindən asılılığı azaltmaq üçün identifikasiya standartları hazırlayır. Yəni istifadəçilər barmaq izi oxuyucu və Face ID vasitəsi ilə öz hesablarını, şəxsi məlumatlarını qoruyacaq.
