Nvidia şirkəti Ada Lovelace kod adlı RTX 4000 videokart seriyasını bu ilin payız aylarında təqdim edəcək. Bu səbəblə şirkətin və istehsal partnyorlarının bu videokartları test etmə zamanı gəlib çatıb. Videokart sızıntı xəbərləri ilə məşhur olan Kopite7Kimi bildirib ki, artıq test mərhələsi başlayıb.
Standart olaraq bir videokartın hazırlanma müddəti bir ildən daha uzun çəkir. Bu səbəblə Nvidia şirkəti artıq videokart çiplərini və drayverlərini hazırlamış ola bilər. Əvvəlki məlumatlara əsasən şirkət RTX 4000 seriyası ilə videokartların gücünü zirvəyə çıxaracaq. Yəni RTX 3000 videokartlarına nəzərən daha güclü videokartlar görəcəyik. Lakin mənbələr bildirmişdi ki, yüksək güc və performans səbəbindən videokartların tələb etdiyi enerji miqdarı da kəskin şəkildə artacaq. Buna görə də RTX 4000 seriyasında 12+4 pinlik enerji konnektorları istifadə oluna bilər.
Nvidia RTX 4000: Ada Lovelace və Hopper arxitekturası
Ümumi olaraq qeyd etdiyimiz kimi Nvidia Ada Lovelace arxitekturası ilə istifadəçilərə oyun və qrafik tərəfində yüksək performans təklif edəcək. Digər tərəfdən şirkətin yüksək işləmə gücü və süni intellekt proyektlərində istifadə edəcəyi arxitektura isə Hopper olacaq. Bir digər bilinən məlumat isə odur ki, Nvidia şirkəti bu videokartların istehsalında TSMC şirkətinin 5nm istehsal prosesindən istifadə edəcək. Bu səbəblə RTX 4000 ailəsi yüksək tranzistor sayı, yeni arxitektura və kiçik nanometrli istehsal səbəbilə öncəki RTX 3000 seriyasına görə daha performanslı olacaq. Ən əsas onu qeyd edək ki, Nvidia yeni videokartların bu il gələcəyini rəsmi olaraq təsdiqləməyib. Lakin şirkətin məhsul kateqoriyasına baxdığımızda görürük ki, Nvidia hər 2 ildən bir yeni videokartlarını təqdim edir. Buna görə də yeni məhsulların bu il gəlməsi gözlənilir.
Digər tərəfdən Nvidia-nın rəqibi olan AMD şirkəti də özünün yeni nəsil videokartlarını təqdim edəcək. Ray Tracing (İşıq izləmə) dəstəyi olan AMD videokartları saf güc baxımından Nvidia-nın yeni videokartlarından daha güclü ola bilər. RDNA arxitekturası ilə AMD son illərdə öz videokart cihazlarında ciddi performans artışı əldə edə bilib.
